Partizani zhvilloi ndeshjen e kthimit të turit të dytë të Europa League në transfertë kundër Sheriff Tiraspol.
Sherif Tiraspol arriti të kualifikohej me rezultatin e përgjithshëm 2-1 dhe kaloi në turin tjetër.
Të kuqtë e mbyllën pjesën e parë në avantazh 1-0, me golin e shënuar në minutën e 29-të nga Asani.
Në fraksionin e dytë, moldavët shënojnë në minutën e 63-të një gol të diskutueshëm, duke barazuar shifrat.
Barazimi do të vinte mes polemikave, pasi goli i vendasve fillimisht u anulua nga vijërojtësi për pozicion jashtë loje e pastaj u kthye nga kryesori.
Ky ishte dhe goli që i dha kualifikimin vendësve.
Mirëpo në kronikën e lajmeve të përgatitur nga televizioni i Tiraspolit “TCB online” transmetohej edhe një pamje nga një kamerë anësore e stadiumit, që tregon qartë se në momentin e nisjes së topit, është Balima, që pengon Brojën, edhe pse autori i golit, N’Diaje, gjendet në pozicion të rregullt.
Në bazë të rregullores së re, nëse një lojtar pengon lojtarin mbrojtës (interferon), konkretisht Brojën, atëherë goli duhet anuluar, sepse konsiderohet pozicion jashtë loje.
