Presidenti Ilir Meta ka publikuar një video në rrjet, ku shfaqet duke ecur në një përrua, ndërsa i ka lindur pyetja sepse zgjidhjen e krizës politike në vend nuk ia besojnë një institucioni që ekziston, por ia kërkojnë një institucioni që nuk ekziston.
Kreu i Shtetit edhe para pak ditësh bëri disa propozime, në formën e një pakete, duke ofruar edhe largimin e tij nga Presidenca, në funksion të zgjidhjes së krizës politike, mbajtjen e zgjedhjeve më 13 tetor, në mënyrë që Shqipëria të kishte shpresa për hapjen e negociatave më 18 tetor.
Propozimet e Metës kanë kaluar në heshtje nga Kryeministri Edi Rama, ndërsa kundër tij kanë reaguar disa nga emrat e njohur në rradhët e Rilindjes, që herë pas herë me apo pa komandë, marrin përsipër sulmet dhe akuzat ndaj Presidentit.
“Pas një terapie me ujë bore, më lindi një pyetje që dua ta ndaj me ju, dhe që u drejtohet atyre të cilët bëjnë si të paanshëm, pasi kanë shkëlqyer me njëanshmërinë e tyre, duke ia kaluar dhe Kryeministrit tonë, i cili në fund të fundit përfaqëson një anë politike: Pse nuk keni sy për të parë apo veshë për të dëgjuar zgjidhjen e krizës që ka dhënë një institucion që ekziston, por ia kërkoni zgjidhjen një institucioni që nuk ekziston, falë edhe paanësisë tuaj tepër të vonuar?
Kaq të domosdoshëm e keni dështimin e çeljes së negociatave për vendin tonë në 18 tetor?”, shkruan Meta në rrjet.
