Lulzim Caka, njëri nga personazhet e njohur të botës së krimit gjatë viteve 1997-1999 në Shqipëri, ka përfunduar dënimin dhe është liruar.
Caka ka lënë burgun ditën e hënën në mëngjes rreth orës 10:00.
I arrestuar dhe liruar disa herë për mungesë provash, Caka arriti t’i shpëtojë burgimit të përjetshëm për shkak të pingpongut të dosjes së tij nga gjykatat, por edhe mbrojtjes së kualifikuar.
Caka u ekstradua nga Italia drejt Shqipërisë në vitin 2003, ndërsa vuajti 16 vite burg, të cilat iu konvertuan duke iu konsideruar si 25 vjet heqje lirie, aq sa ishte edhe dënimi për të.
Rreth Cakës rrotullohen shumë nga ngjarjet e tmerrshme të viteve më parë, duke krijuar figurën e një killeri por edhe hakmarrësi.
Gjatë kohës që ishte në burg, Caka u përball me ngjarjen e rëndë të vrasjes së nënës së tij, e cila u rrëmbye në derën e komisariatit të policisë në vitin 1999, dhe u gjet e masakruar në pyllin e Semanit.
Por ngjarja nuk mbeti këtu, dy autorët e dyshuar të ngjarjes së rëndë u ekzekutuan në mes të fshatit Samaticë. Ata ishin Valter Bega dhe Mariglen Cami.
Caka është akuzuar për sulmin me armë ndaj dy ish-zyrtarëve të lartë policie, Ilir Ngresin dhe Gani Malushin.
Malushi u ekzekutua vite më pas në Durrës dhe Ngresi në Vlorë, në episode të tjera, nga persona të tjerë. Pikërisht sulmi me armë ndaj Malushit dhe Ngresit shënoi edhe aksionin që do të çonte në arrestimin e Lulzim Cakës dhe përballjen e tij me drejtësinë.
Caka gjithashtu është dënuar për vrasjen e Pëllumb Eminit, krim ky që pasoi me vrasjen e nënës së të “fortit” të Beratit.
Gjithashtu, Lulzim Caka u arratis nga burgu, më pas drejt Italisë, ku qëndroi rreth 15 muaj deri në arrestimin dhe ekstradimin drejt Shqipërisë, ku vuajti 16 vitet e burgut.
