Pas Devollit, Kavaja është përzgjedhur si bashkia e dytë, që drejtohet nga opozita, që do të tentohet të merret nën kontroll nga Rilindja dhe kandidati i saj, i dalë si kryebashkiak nga votimet e 30 qershorit, Redjan Krali.
Kryebashkiaku Isa Sakja shprehet i vendosur për të mos dorëzuar zyrën, duke e cilësuar procesin e 30 qershorit si anti-kushtetues.
Në kushte të tilla, Sakja dhe opozita, nuk njeh kryebashkiakët e dalë nga këto votime.
Nuk dihet nëse nga Rilindja do të përdoret i njëjti skenar si në Devoll, kur zyrat e bashkisë u hapën në mënyrë të dhunshme nga kryebashkiaku i ri, ndërsa në mbështetje të tij ishin forcat e policisë, drejtues të qarkut dhe Prefekturës.
Sikundër raportohet, në Kavajë pritet të mbërrijnë prefektja e Tiranës, kryetari i qarkut, dhe përfaqësues të qeverisë.
Në anën tjetër, opozita është organizuar dhe shprehet se nuk do të lejojë pushtimin e bashkisë, sikundër trajtohet procesi i marrjes së zyrave të kryebashkiakëve nga ata që u votuan më 30 qershor.
