Masakroi gruan me thikë dhe mbyti veten në det, ekspertiza nxjerr përfundimin nga se vuante 37- vjeçari.
Adriatik Kuka, i cili një javë më parë vrau bashkëshorten duke e qëlluar 15 herë më thikë dhe pas disa orësh u vetëmbyt në det, rezulton se vuante nga skizofrenia. Në këtë përfundim ka dalë Mjekësia Ligjore, e cila ka nxjerrë edhe rezultatet e ekspertizës. Duke analizuar të gjitha provat dhe faktet, si dhe sjelljen në momentin e vrasjes apo edhe më pas të bashkëshortit, mjekët ligjorë thonë se kemi të bëjmë me një person skizofren.
“Bazuar nga veprimet e Adriatik Kukës, kemi dalë në përfundimin se ai ishte skizofren. Një person që qëllon barbarisht 15 herë me thikë bashkëshorten dhe më pas mbytet në det, i ka të gjitha shenjat e skizofrenisë.
Edhe fakti që është mbytur me rreth një metër ujë thellësi tregon qartë se sa me probleme psikologjike ishte. Një njeri normal, nuk mund të mbytet më një nivel të tillë uji, edhe sikur të ketë vendosur t’i japë fund jetës. Ndërkohë, një person më probleme mendore (sikurse edhe rasti në fjalë) mund të mbytet. Pra, Adriatik Kuka është mbytur me vullnetin e tij në det dhe më pas dallgët e kanë nxjerrë në breg”, thanë burime nga Mjekësia Ligjore, e cila ka përpiluar edhe rezultatin e ekspertizës.
Ndërkohë, sa i përket personalitetit të Adriatik Kukës, ai në jetën e përditshme shfaqte dy personalitete. Në shoqëri, Adriatiku ishte një djalë shembullor, i shoqërueshëm dhe me humor. Ndërsa në jetën bashkëshortore shfaqet një njeri ekstremist xheloz për të shoqen, e cila spikaste për një femër shembullore jo vetëm në rrethin farefisnor, por edhe në rrethin shoqëror.
Sipas të afërmve të familjes Kuka, Adriatiku ka qenë gjithmonë (edhe pa shkak) xheloz për bashkëshorten, por kohët e fundit xhelozia kishte sjellë debate të forta në familje. Për shkak të xhelozisë së sëmurë, kohët e fundit Adriatiku kishte nisur ta ruante bashkëshorten, madje i shkonte edhe te vendi i saj i punës, çerdhes në lagjen Nr. 8, ku janë të punësuara vetëm femra. Ai ishte parë disa herë nga koleget e Hazbijes në ambientet e jashtme të godinës 2-katëshe (çerdhe), duke e ulur bashkëshorten para personelit me sjelljen e tij. Madje, ky ka qenë edhe shkaku që çifti Kula debatoi ditën e fundit.
Hazbija i kishte kërkuar llogari Adriatikut përse e ruante në vendin e saj të punës. Sherri mes tyre ka degraduar duke bërë që 37-vjeçari të humbte qetësinë dhe më pas të rrëmbente thikën e bukës, me të cilën e qëlloi të shoqen 15 herë, duke e lënë të gjakosur në tokë. Më pas, ai u largua dhe u gjend i vdekur në bregdetin e Sektorit Rinia.
Ngjarja e rëndë u regjistrua mesditën e 19 korrikut më lagjen 15 të qytetit të Durrësit, e njohur ndryshe si zona e Spitallës. Konflikti fatal u zhvillua në ambientet e brendshme të banesës 1- katëshe të çiftit Kuka, ku i pranishëm ishte edhe djali i tyre 11-vjeçar, i cili u bë dëshmitar i një shfaqjeje mjaft të rëndë. Adriatik Kuka ishte i punësuar si shofer pranë Drejtorisë së Operatorit të Shpërndarjes së Energjisë Elektrike në Durrës, ku shërbente si shofer personal i kunatit të kryetarit të Bashkisë Durrës, Vangjush Dako. /Panorama/
