Një celular i fshehur në të brendshme, i zbuluar në kontrollet e fundit gjatë transferimit të një burgosuri, ka sjellë ndalimin e 8 efektivëve të burgjeve.
Mbrëmjen e djeshme, u bë transferimi i Dritan V., nga burgu i Peqinit në atë 313 në Tiranë. Por, gjatë kontrollit në kryeqytet, atij iu gjet në të mbathura, një celular.
Për këtë, siç njoftoi zyrtarisht SHÇKB, janë arrestuar 5 punonjësit e policisë të burgjeve. Burime nga Drejtoria e Burgjeve thanë për Boldnews se për të njëjtin rast janë ndaluar edhe tre punonjës së Drejtorisë së Përgjithshme të Burgjeve, të cilët ishin pjesë e patrullës që bënë transferimin e të dënuarit nga burgu i Peqinit në atë 313, në kryeqytet. Akuza është e njëjtë, shpërdorim detyre.
Edhe ndaj Dritan V. u ngrit një akuzë, ajo e futjes ose mbajtjes e sendeve të ndaluara në institucionin e ekzekutimit të vendimeve me burgim.
“5 punonjës të policisë së burgjeve janë arrestuar nga ana e SHÇKB-së në Peqin, për shkak se akuzohen se kanë shpërdoruar detyrën. 5 punonjësit e policisë që janë arrestuar janë: A.O, L.C, B.K, D.Q, K.H, ndërsa akuzohen se nuk kanë kryer në mënyrë korrekte detyrën e tyre, atë të kontrollit të të paraburgosurve dhe të dënuarve. Si pasojë e mos kryerjes në mënyrë të saktë të detyrës, pasi kanë ushtruar kontroll ndaj të dënuarit Dritan V., nuk kanë arritur ti gjejnë sende të paligjshme. Në këto kushte është bërë arrestimi në flagranc i 5 efektivëve operacional. Gjithashtu është kryer arrestimi në flagrancë edhe i të dënuarit Dritan V., pasi ka konsumuar element të veprës penale parashikuar nga neni 324/a i Kodit Penal. I dënuari Dritan V., ka pasur telefon me vete nga kalimi nga IEVP Peqin në IEVP 313, ku gjatë transportit kaluar 3 kontrolle”, njoftoi SHÇKB. /Boldnews.al/
