Tentuan të pastronin pusin, humbasin jetën motër e vëlla.
Fatmirësisht ekipet e emergjencave arritën të shpëtonin djalin e 36-vjeçares Rabia Vural, e cila bashkë me vëllain e saj binjak, Ramazan Gurel, humbën jetën në provincën Burdur të Turqisë.
“Cnn Turk” raporton se ngjarja ka ndodhur pasditen e së shtunës, ku 36-vjeçarja Rabia Vural, vëllai i saj binjak Ramazan Gürel dhe djali i saj Osman Vural, 18-vjeç, nisën punën për të pastruar pusin afër kullotave.
Pasi boshatisi ujin, Osman Vural zbriti në fund të pusit për ta pastruar, por i ra të fikët si pasojë e mungesës së oksigjenit.
Në ndihmë fillimisht i shkoi daja, i cili zbriti në fund të pusit pothuajse 20 metra të thellë, me diametër rreth 1 metër. Por edhe ai mbeti pa ndjenja si pasojë e mungesës së oksigjenit, teksa përpiqej të nxirrte nipin.
Në panik e sipër, në pus zbriti edhe Rabia Vural, e cila po ashtu nuk ia doli të ndihmonte të afërmit, por ra pa ndjenja.
Të afërm të tyre, të cilët mbërritën tek pusi, njoftuan menjëherë urgjencën zjarrfikësit dhe xhandarmërinë.
Forcat e ndihmës së shpejtë nxorën fillimisht trupat e pajetë të Rabia Vural dhe vëllait të saj binjak.
Osman Vural ndërkohë u arrit të rikthehet në jetë falë masazhit të zemrës që iu bë në ambulancë, por i riu vijon të mbetet në gjendje të rëndë për jetën.
