Ambasada e SHBA në Tiranë ka nxjerrë një njoftim të rëndësishëm në faqen e saj zyrtare në rrjetin social në facebook.
Në fakt nuk është ndonjë njoftim që mund të ndihmojë shqiptarët, bie fjala në lehtësimin e procedurave për viza, apo të ndihmojë në zgjidhjen e krizës politike, apo t’i shërbejë qoftë edhe shtresave në nevojë.
Është një njoftim tregtar, ku ambasada ka vendosur të shesë ca mobilje dhe pajisje elektroshtëpiake.
Pak a shumë si ato reklamat që shfaqen dhe njoftojnë se “X” qendër tregtare ofron këto pajisje. Ndryshimi i vetëm është se në njoftimin e ambasadës nuk jepet ndonjë ofertë, bie fjala që çmimi të ketë pësuar ndonjë ulje kaq apo aq përqind.
“Ambasada e Shteteve të Bashkuara në Tiranë shet mobilje dhe pajisje shtëpiake, dhe artikuj të tjerë nëpërmjet ankandit “online” në këtë adresë…”, thuhet në njoftimin e Ambasadës.
Një procedurë kjo që ndodh pothuajse çdo vit, herë me pajisje dhe herë me automjete.
Duket se në prag të ardhjes së Ambasadores së re, Ambasada do të rinovojë edhe pajisjet dhe këtë e bën përmes një tenderi, ku të interesuarit mund të aplikojnë për të blerë një lavatrice, sobë gatimi, frigoriferë, kondicioner, tavolinë buke etj etj…
Nuk është gjë e pakët që bie fjala në shtëpi, nga të interesuarit, mund të kenë sobën ku mund të ketë gatuar ambasadori.
Po kështu mund të ketë edhe lavatriçen, ku mund të jenë larë rrobat e diplomatëve që shërbejnë në Tiranë.
Dhe ndoshta nga ky moment mund t’ju ecë fati mbarë. Pasi mund t’ju dalë lotaria amerikane, ose ose mundet që të shpëtoni edhe nga paralajmërimet dhe kërcënimet e kryeministrit që nuk u lejon të udhëtoni drejt SHBA, nëse keni prekur zgjedhjet.
Në fund të fundit nuk është gjë e vogël, që brenda banesës të ketë një pajisje që për 1, 2, 3, 4 apo më shumë vite t’i ketë shërbyer stafit të Ambasadës.
Njoftimi është pasuar nga komente të shumta, shumë prej tyre me nota humori dhe tallëse, që ndoshta nuk do të trajtohen nga kryeministri si sulm ndaj diplomatëve, sikundër ndodhi në rastin e një parrulle që u shkruajt në hyrjen e banesës së diplomatit që drejton selinë e OSBE-së.
Por ajo që është më e rëndësishmja është që ankandi të përmbyllet me sukses. Ndoshta nga ky sukses do të varet edhe zgjidhja e krizës politike dhe përmbushja e disa standardeve në Shqipëri, ndoshta në minimalen e atyre që janë në SHBA.
