Komisioni hetimor miratoi me unanimitet planin paraprak “për kontrollin e ligjshmërisë së veprimeve të kryera nga ana e Presidentit të Republikës së Shqipërisë, në kuadër të ushtrimit të kompetencave të tij lidhur me zhvillimin e zgjedhjeve për organet e qeverisjes vendore”.
Gjatë diskutimeve, deputeti i “opozitës së re”, Adritaik Alimadhi, kërkoi që përveç Presidentit Ilir Meta, të merren në pyetje nga komisioni edhe anëtarët e KQZ-së. Kryetari i komisionit Ulsi Manja, mbështeti kërkesën, duke u shprehur se secili nga anëtaret ka të drejtë të kërkojë çdo lloj prove.
Alimadhi: KQZ të jetë pjesë e këtij komisioni. KQZ ta kemi si pikë të rendit te kreu i dytë që të thirret se KQZ ka hedhur poshtë dekretin e presidentit.
Manja: Secili nga anëtaret, pa u mbyllur hetimi mund të kërkojë çdo lloj prove. Është procedurë. Në çdo kohë, secili nga anëtarët, jo vetëm këto që janë parashikuar, po në çdo fazë të hetimit, ka të drejtë të kërkojë çdo lloj prove.
Po me unanimitet mes opozitës së re dhe mazhorancës, u votua miratimi në parim “i Rregullores së Brendshme të Komisionit”.
