Një aksident tragjik me pasojë vdekjen e dy shqiptarëve ka ndodhur në Shtetet e Bashkuara të Amerikës mëngjesin e 29 qershorit. Mediat amerikane raportuan dje se lidhur me ngjarjen arrestuan 29-vjeçarin Donald Kumar Davis. Ai akuzohet si përgjegjës i aksidentit që solli vdekjen e çiftit shqiptar. Ndërkohë familjarët e çiftit shqiptar kanë bërë apel për nidhmë financiare në “gofundme“, në mënyrë që Muhamet dhe Bukurie Oparaku të prehen në Atdhe.
Ngjarja e rëndë ka ndodhur në New Jersey, ndërsa viktima kanë mbetur shtetasit Muhamet Oparaku, 68 vjeç, dhe bashkëshortja e tij, Bukurie Oparaku, 64 vjeçe.
Çifti shqiptar që lëvizte me nje Tojota, është përplasur nga një makinë tip “Doge”, që po lëvizte me shpejtësi, duke ndërruar jetë në spital. Policia amerikane ka arrestuar 29-vjeçarin, Donald Kumar Davis, i cili ka qenë duke drejtuar mjetin, që iu ka marrë jetën shqiptarëve.
Shqiptarët jetonin prej disa vitesh në SHBA. Muhamet Oparaku kishte punuar si shef policie në Pogradec, ndërsa në SHBA punonte si menaxher në një kompani.
Njëri nga kolegët e tij është shprehur se Oparaku ishte një njeri punëtor, duke e cilësuar si menaxher të madh.
“Ishin njerëz shumë të dashur dhe punëtor. Ai ishte një menaxher i madh dhe i përulur, inteligjent dhe gjithmonë i respektueshëm. Dëshira e vetme e çiftit ishte që të varroseshin në Shqipëri. Ne do të plotësojmë amanetin e tyre”, ka treguar ai.
