Për shkak të rrezikut që mund t’i paraqesë Kosovës, ish-këshilltarja e kryeministrit Ramush Haradinaj, Nita Himaduna, është vënë nën mbikëqyrje nga Inteligjenca e Kosovës.
Ministri i Punëve të Jashtme, Behgjet Pacolli, i ka dërguar një shkresë drejtorit të Agjencisë së Kosovës për Inteligjencë, Shpend Maxhuni, nga i cili ka kërkuar verifikim për konsullen e re, raporton KTV.
“Duke pasur parasysh që në shërbimin e jashtëm të Republikës së Kosovës, që nga fillimi i punës sime, ka pasur ndryshime në stafin diplomatik, ju drejtohem përmes kësaj letre me kërkesën që AKI-ja, me procedurë urgjente të bëjë verifikimin e Znj. Nita Himaduna, e cila është emëruar konsulle në Misionin Konsullor të Republikës së Kosovës në Nju Jork – SHBA”, thuhet në shkresën drejtuar AKI-së.
Ndër të tjera, në letër thuhet që e gjithë kjo procedurë të mbetet e fshehtë.
Një nga çështjet e ngritura ka të bëjë edhe me vrasjen e politikanit serb të veriut të Kosovës, Oliver Ivanoviç.
Sipas shkresës, një familjar i Himadunës ka qenë në komunikim me Veljko Kaziç, i cili aty identifikohet si “pjesë e strukturave të sigurisë së Serbisë me mbulesë në Ambasadën e Serbisë në Tiranë, i cili e mbulon edhe Kosovën”.
Një tjetër ka të bëjë edhe me keqpërdorim të buxhetit.
Konsullja kishte rezervuar hotele në emër të Zyrës së Kryeministrit, edhe pasi ishte larguar nga institucioni.
“Duke i pasur për bazë këto që u thanë më lartë, posaçërisht dyshimet për lidhje të saj me punonjës të shërbimeve serbe të inteligjencës, është vlerësuar me interes që Nita Himaduna të mos ketë qasje (punësohet në pozitë të ndjeshme) në institucionet e Republikës së Kosovës, pasi që mund të paraqesë rrezik për sigurinë e Republikës së Kosovës”, thuhet në shkresë.
Në Zyrën e kryeministrit nuk kanë dhënë ndonjë informatë rreth çështjes së keqpërdorimit të buxhetit publik.
E nga MPJ-ja, thonë që kjo është procedurë standarde për diplomatë.
Ndërkaq, për Nita Himadunën çështjet e ngritura në shkresë janë hajgare.
“Boll keni rrejt. Apet me rrejtë nuk bon”, ka thënë ajo, kur i janë treguar pretendimet e ngritura në shkresë.
Javën e shkuar, raportimi rreth emërimit të Himadunës e ka bërë të reagojë ambasadorin amerikan në Prishtinë, Philip Kosnett./Express
