Policia bashkiake e Tiranës vazhdimisht merr masa administrative për shkelësit e rregullave sa i takon parkimit të automjeteve.
Për të përforcuar aksionin e bashkiakëve, Kreu i bashkisë, Erion Veliaj ka publikuar disa foto në facebook, ku shihet qartë ‘puna’ e dobishme e policisë së qytetit dhe gjobitja e qytetarëve që kanë pushuar automjetin në vendet e rezervuara për persona me aftësi të kufizuar.
“Qytet i mirë nuk është ai ku makina e shtrenjtë apo njohja me kryetarin të mbron, por hapësira që respekton secilin. Asnjë s’do t’i bllokojnë makinën, por insistojmë që të respektohen ata me aftësi të kufizuar si solidaritet qytetar”, shkruan Veliaj.
Por, disa qytetarë kanë komentuar jo këndshëm për kryebahskiakun duke shprehur rezerva për punën e Bashkisë. Një prej tyre thotë se, tabela tregon shenjën e karrotrecit dhe jo bllokuesin e rrotës.
Shumë prej komentuesve thonë se bashkia duhet të zgjidhë problemin e vendeve të parkimeve para se të marrë masa penalizuese.
Madje një qytetar tjetër, i shkruan Veliajt se çdo ditë të enjte rruga para Parlamentit bllokohet nga makinat e deputetëve por asnjë prej tyre nuk gjobitet apo bllokohet.
