Ministri izraelit i Sigurisë së Brendshme, Gilad Erdan, ka akuzuar rrjetin më të madh social Facebook dhe themeluesin e tij, Mark Zuckerberg, se nuk ka bërë mjaftueshëm për të parandaluar provokimet kundër Izraelit dhe tha se ky rrjet social ka “sabotuar” punën e policisë izraelite.
Në të kaluarën, Izraeli ka thënë se Facebook është përdorë për të nxitur sulme dhe Qeveria është duke hartuar një legjislacion i cili do të mundësonte urdhërimin e Facebookut, YouTube-it, Twitter-it dhe mediat tjera sociale për të hequr postimet online të cilat konsiderohen se nxisin terrorizmin, transmeton Koha.net.
Erdan ka thënë se Zuckerberg është përgjegjës për politikën e Facebookut dhe u bëri thirrje “qytetarëve të Izraelit që të bëjnë kërkesa nga çdo vend i mundshëm për të monitoruar platformën të cilën ai e krijoi dhe nga e cila ai përfiton miliardat”.
Zëdhënësi i Facebookut në Izrael ka thënë se kompania nuk komenton fare në lidhje me pohimet e ministrit.
Gjatë një interviste për televizionin Channel 2, Erdan tha, “Facebook sot, i cili solli një revolucion të mrekullueshëm e pozitiv në botë, fatkeqësisht është shndërruar në një përbindësh, sidomos që nga ngritja e Daesh (Shtetit Islamik) dhe valës së terrorit”.
Që nga tetori i vitit të kaluar, palestinezët kanë vrarë 34 izraelitë dhe dy vizitorë shtetas amerikanë, në një valë sulmesh në rrugë, kryesisht therje me thikë. Forcat izraelite kanë vrarë të paktën 201 palestinezë, 137 prej të cilave Izraeli ka thënë se ishin sulmuesit. Të tjerët janë vrarë në përleshje dhe protesta.
