Nga Boldnews.al
Edi Rama i shkoi deri në fund marrëzisë së tij për të zhvilluar votime mono-partiake këtë 30 Qershor.
Në 1 Korrik, Shqipëria gdhihet e gjitha e ngjyrosur me bojën e “Rilindjes”. Tashmë, me një pushtet ekzekutiv nën kontroll të plotë, me një legjislativ karikaturë të Qeverisë, me një sistem drejtësie që po gremiset dita-ditës nën diktatin e tij, Edi Rama rrëmbeu “në tavolinë” edhe pushtetin lokal.
Këto votime, të pahasura në asnjë vend me pluralizëm normal, natyrisht që do të kenë pasoja të rënda, politike e sociale, jo vetëm në ditët e nxehta të kësaj vere, por edhe në muajt e ndoshta vitet e ardhshme.
Pasojat politike
Edi Rama, me vendosmërinë e tij të pakuptimtë për të zhvilluar votime më 30 Qershor, shënoi fundin e mundësisë për dialogun politik.
Disa optimistë, të cilët nuk duan të pranojnë prirjet autokratike të Edi Ramës, shpresuan në një tërheqje të “orës së fundit” prej tij, duke zgjidhur ngërçin politik të radhës ashtu siç ka ndodhur shpesh-në minutat e fundit.
Por, edhe optimistët më të mëdhenj, që mbështesnin këtë skenar, u zhgënjyen mëngjesin e së dielës, kur “rilindasit” dhe zyrtarët nën presion të administratës iu drejtuan kutive të votimit.
Me këtë sjellje aspak demokratike, Edi Rama prishi disa ekuilibra politikë, të cilët do të duan shumë mund dhe kohë të riparohen.
Sot, kryeministri, nuk mendon për zgjidhje e dialog politik, pasi ndihet i plotfuqishëm. Por rregullat e demokracisë, edhe kësaj të brishtës që ka Shqipëria, vjen një moment dhe sjellin rotacionin politik.
Edi Rama do i kuptojë pasojat e vendimit të tij për t’i vënë vizën dialogut me opozitën kur t’i vijë momenti të humbasë pushtetin.
Ai dhe “rilindasit” e tij do të duhet të mbajnë shënim sjelljet arbitrare të tyre sot, për t’u kujtuar kur të jenë në opozitë se me sa arrogancë e kanë trajtuar nevojën e dialogun politik.
Gjithashtu, do të duhet të mbajnë shënim se si do të trajtohen nga disa ndërkombëtarë të rëndomtë, të cilët mbërrijnë në Shqipëri për të proklamuar vlerat e demokracisë dhe mbështesin, në çdo rast, qeverinë dhe përfitojnë benefitet prej saj.
Pasojat sociale
Ndryshimet politike në drejtimin e institucioneve, për fat të keq, pasohen me ndryshimet e punonjësve deri në nivelin më të ulët, në bazë të përkatësive partiake.
Aktualisht, “Rilindja” ka “pushtuar” të gjithë administratën qendrore. Në çdo institucion të pushtetit ekzekutiv, nuk gjendet asnjë votues opozitar.
Pas votimeve të 30 Qershorit, “rilindasit” do të pushtojnë çdo njësi të pushtetit lokal. Në këtë mënyrë, punonjësit që punojnë aktualisht në bashkitë e drejtuara nga opozita, shumë shpejt do të dalin të papunë.
Kjo situatë, jo vetëm që do të përkeqësojë raportet aktuale politike, por do të sjellë ndasi të mëdha ndërmjet vetë qytetarëve.
Ata që do të largohen nga puna për shkak të zgjedhjeve mono-partiake, do ta kenë të vështirë të pranojnë që do të humbasin bukën e familjes, duke u lënë vendin rilindasve të gëzuar.
Edhe nëse nuk do të ketë përplasje sociale të drejtpërdrejte mes qytetarëve, konflikti mes tyre do të qëndrojë gjithnjë i hapur.
Kur të vijë ai momenti që “Rilindja” do të kalojë në opozitë, të kënaqurit e sotëm do të mbeten jo thjesht të papunë, por ndoshta edhe do të përbuzen nga ata që sot do të humbasin mundësinë për të ushqyer familjen.
Pasojat, siç duket, do të jenë të rënda e do të shtrihen në kohë. Të gjithë do të kuptojnë se dëmet e ardhshme janë pasojë të veprimeve të një njeriu delirant, i cili, 30 vjet pas rënies së komunizmit, vendosi të rikthente vendimet moniste.
