Lungomarja e famshme përveç se nuk ka përfunduar po krijon edhe probleme shumë të mëdha për Vlorën turistike. Punimet në rrugë dhe qarkullimi vetëm në një korsi ka bërë që ditën e sotme të krijohet një varg i gjatë makinash me kilometra të tëra. Ka pasur madje automjete që për shkak të qëndrimit për një kohë gjatë në vend janë nxehur dhe është dashur të ndalojnë.
Kanë qenë vetë qytetarët që kanë dërguar ankesat e tyre në Boldnews.al duke thënë se për shkak të temperaturave të larta kanë pasur edhe probleme shëndetësore. Kjo pasi kanë pritur rreth 1 orë për të kaluar nga zona e Skelës deri në Ujin e Ftohtë. “Është tmerr, kemi 1 orë që nuk lëvizim fare, a rrihet në këtë të nxehtë jashtë. Jemi bërë për spital”, kanë thënë ata.
Megjithë ndërhyrjen e policisë asgjë nuk është normalizuar dhe kjo situatë pritet të vijojë deri në mbrëmje.
Çdo vit ky aks është një nga më problematikët dhe qarkullimi jo rrallë është devijuar. Me ndërtimin e Lungomares pritej që edhe ky problem të merrte fund por me sa duket pushuesit do duhet të presin sërish edhe këtë vit, por a mund të presë Vlora pushues e turistë në këto kushte?
(Boldnews)
