Edi Rama po shkon drejt 30 qershorit, ditës së votimeve për të nxjerrë fitues 61 kandidatët e përzgjedhur prej tij si kryebashkiak.
Pavarësisht se Presidenti anulloi mbajtjen e zgjedhjeve vendore në këtë datë, ndërsa dekretoi 13 tetorin si ditën kur zhvillohen këto zgjedhje, Rama i vendosur për të bërë votime, nuk hoqi dorë, përkundrazi të vetmin problem që ka sot është pjesëmarrja.
Kjo situatë nuk ndodh në Shqipëri prej 29 vitesh, ndërsa votimet e fundit janë realizuar në kohën e diktaturës.
Madje edhe Ramiz Alia në shkurt të 1991, vendosi shtyrjen e zgjedhjeve për në 31 mars, duke i dhënë mundësinë partive opozitare të asaj kohe të ishin pjesë e procesit dhe të realizoheshin zgjedhjet e para pluraliste prej vitit 1945.
E gjithë kjo situatë ka krijuar reagime të shumta, por edhe humor.
Në rrjet qarkullojnë foto nga gazeta Zëri i Popullit, gjatë viteve të diktaturës, kur pjesëmarrja në votime ishte 99.99 % dhe pro kandidatëve të Frontit demokratik kishin votuar po 99.99%.
Ndoshta Rama nuk do të mund të realizojë pjesëmarrjen në votime në shifra të tilla, por votën pro i ka mundësitë që ta ketë edhe më të mirë se në kohën e komunizmit.
