Nga Boldnews.al
Sot duhet qarë nën zë, pa britma, ka “vdekur pluralizmi dhe demokracia”. Është shtrirë në një arkivol dhe pret t’i vihet kapaku, nesër, të dielën në mëngjes, në orën 07.00, kryhet varrimi. Ftohen të marrin pjesë të gjithë Rilindasit, për të hedhur një grush dhe’ mbi arkivol (kutinë e votimit).
Pas 29 vitesh jetë, pluralizmi politik ra përgjithnjë, për t’i hapur rrugë sistemimit njëpartiak, me në krye “komandantin tonë legjendar, shokun Edi Rama”, (cituar nga Tërmet Peçi). Më datë 1 korrik, do të kemi një parti të vetme që fiton me votime dhe jo zgjedhje 61 bashkitë e vendit. Ishte i vetmi pushtet që Rama nuk e kontrollonte totalisht. Tashmë edhe atë e ka në duar.
Sot, kur qytetaria qan nën zë për “vdekjen e pluralizmit”, shkaktari i vdekjes po lahet në det. Ka zgjedhur bregdetin e Himarës jo për të larë mëkatet, por për tu kredhur deteve dhe të jetë i kthejëllët nesër në mëngjes, në mbajtjen e një ceremonie madhështore, në përcjelljen drejt varrit të pluralizmin politik, demokracisë dhe votës së lirë.
Ka gjashtë vjet që sistemi pluralist dhe demokracia lëngon për të ardhur në muajin e fundit në një agoni të pakthimtë. Çfarë nuk i bënë duke e plagosur herë pas here. Në vitin 2016, demokracia dhe vota e lirë u “përdhunua” masivisht në Dibër. Dhunuesit e saj ata që nuk e rruajnë K…, ata që vetëquhen “K… derra, etj epitete, gjithnjë me fjalën K në gojë, i dhanë sulmin e rëndë. Shkak u bënë brekët e grisura të Shukriut Rilindas, për të dërguar nga Tirana një grup “përdhunuesish” të votës së lirë.
Një pjesë e dibranëve iu dorëzuan këtij histrizmi qeveritar, pas kërcënimeve pranuan edhe paranë për të dhënë votën në këtë “përdhunim masiv”. U shkund vendi nga orgjia qeveritare, “Tërmet o tërmet, q…robt”-tha Damian Gjiknuri, ministri Guru i kryeministrit Edi Rama.
Nuk mjaftoi vetëm me kaq. Të ekzaltuar nga ajo çfarë bënë në Dibër, Rilindasit me në krye Edi Ramën këtë histerizëm masiv të përdhunimit të votës së lirë e shtrinë në të gjithë vendin. Kush nuk pranoi ti jepej epsheve të pushtetit, u kërcënua nga kriminelë që të bënin presion haptas, disa të tjerë pranuan të paktën paranë.
Rilindja mori pushtetin sërish me “përdhunim vote”, por edhe kjo iu duk pak.
Kaluan në projektin tjetër. Përse duhet të paguanin e kërcënonin, kur kishte një tjetër mënyrë: Të ketë vetëm një parti dhe populli të shkojë i qetë në votime, ashtu si të parët e tyre në diktaturë. Kjo ndodhi. U shpresua shumë se ndonjë “mjek” nga SHBA apo BE do të vinte dhe jepte jetë pluralizmit, por jo. Ata për momentin e lanë që demokracia të vdesë. Pluralizmin e vrau kryeministri Edi Rama, e qanë opozitarët e pazotë, por do e varrosin Rilindasit.
