Tashmë, Skënderbeu ka filluar të mendojë seriozisht për sezonin e ardhshëm. Pavarësisht se vendimi i radhës pritet të vijë më 12 korrik nga ana e KAS, korçarët nuk duan të humbasin kohë, por po përpiqen të krijojnë sa më shpejt ekipin për sezonin e ri.
Goditja e madhe që pretendohet nga klubi dhe që i jep jetë Skënderbeut të sezonit të ardhshëm është pikërisht Kristi Vangjeli. Mbrojtësi korçar i Skënderbeut duket se do të jetë edhe sezonin e ardhshëm pjesë e bardhekuqve pasi të përfundojë aventurën e tij në Australi në radhët e Adelajde Olimpik.
Nga sa bëhet me dije, lojtari dhe klubi kanë diskutuar edhe më herët rreth mundësisë së rikthimit dhe gjithçka është konkretizuar në ditët e kaluara. Është mbajtur një komunikim i vazhdueshëm mes Vangjelit dhe klubit që gjithçka të mbyllej me sukses dhe korçari sapo të përfundojë aventurën në Australi, do të firmosë rinovimin e kontratës edhe për një tjetër sezon me bardhekuqtë.
Një gjë të tillë e ka konfirmuar edhe presidenti i Skënderbeut, Ardjan Takaj, i cili për “Panorama Sport” tregon se Vangjeli do të jetë pjesë e bardhekuqve për sezonin e ri. “Ne po presim vendimin e KAS-it që del në datën 12 korrik sipas e-mailit që ata kanë dërguar në klub. Mund të them vetëm se Vangjel i është lojtari i Skënderbeut për sezonin e ardhshëm kur të kthehet në gusht nga Australia”, tha shkurtimisht presidenti i Skënderbeut, Ardjan Takaj.
Vangjeli ishte pikërisht një prej atyre që u kishte mbaruar kontrata me Skënderbeun. Korçari pak javë më parë arriti akordin me Adelajden në Australi dhe menjëherë u bë fitues i kupës me këtë ekip. Mbrojtësi pritet që të qëndrojë deri në fund të sezonit në futbollin australian që mbaron në muajin gusht dhe më pas të rikthehet në Korçë për të vijuar aventurën e tij me Skënderbeun në sezonin e ri, atje ku është i graduar edhe zëvendëskapiten i ekipit.
RINOVIMET
Në anën tjetër, duket se Skënderbeu nuk kërkon të humbë kohë, por po mendonpër të mbyllur rinovimet edhe me lojtarët e tjerë që janë pa kontratë me bardhekuqtë. Gjithçka ka nisur nga Leonit Abazi, i cili ka arritur parimisht akordin me klubin për zgjatjen e kontratës. E njëjta gjë mund të thuhet edhe për Oto Xhon. Sulmuesi duket se do të vijojë bashkëpunimin në Korçë dhe një gjë e tillë është konfirmuar edhe nga vetë Takaj. Ndërsa, në pritje po qëndrojë dy shtyllat e ekipit të sezonit të kaluar. Kapiteni Marko Radas dhe mesfushori Gjergji Muzaka janë në listën e lojtarëve që nuk kanë kontrata dhe duket se ende me ta nuk është arritur akordi. Kësaj liste i shtohet edhe Aldo Teqja, i cili ndryshe nga dy të parët duket më larg Skënderbeut për sa i përket të ardhmes.
/Panorama Sport/
