Arrestohen 2 punonjës të Bashkisë Pogradec, për veprën penale “Pengimi i zgjedhësit, kryer në bashkëpunim”.
Specialistët për Hetimin e Krimit, në Komisariatin e Policisë Pogradec bënë arrestimin në flagrancë të shtetasve: S.B, 61 vjeç; G.B, 59 vjeç, banues në Pogradec, (të dy me detyrë punonjës shërbimesh në Seksionin e Arsimit pranë Bashkisë Pogradec), njoftoi policia.
“Arrestimi i tyre u bë pasi janë kapur në flagrancë nga shërbimet e Komisariatit të Policisë Pogradec, duke mbyllur me çelës tre shkolla dhe një kopsht fëmijësh në lagjet nr 2 dhe 5 të qytetit të Pogradecit, të cilat nga Komisioni Qendror i Zgjedhjeve janë vendosur dhe miratuar si qendra votimi, për zgjedhjet e Pushtetit Vendor të datës 30.06.2019. Materialet i kaluan Prokurorisë pranë Gjykatës së Shkallës së Parë Pogradec për veprime të mëtejshme”, shtuan të njëjtat burime.
Qeveria ka vendosur të shkojë në votimet e 30 qershorit pa kundërshtarë në shumicën e bashkive, pavarësisht dekretit të Presidentit Ilir Meta që e caktoi për në 13 tetor datën e zgjedhje. Ndërkohë, bashkitë e drejtuara nga opozita këmbëngulin në zbatimin e dekretit të kreut të shtetit.
