Rreth 15 persona janë ndaluar nga policia në Dibër pas incidenteve në KZAZ-në 19 në këtë bashki.
Një grup qytetarësh protestuan mbrëmjen e së premtes para KZAZ-së, ndërsa policia përdori gazin helmues për t’i shpërndarë.
Më herët protestuesit kishin hedhur fishekzjarre në drejtim të forcave të rendit.
Policia pretendoi për 6 policë të plagosur, ndërsa në spital nuk ka të dhëna që ndonjë efektiv i policisë të ketë kërkuar ndihmën mjekësore.
Ndërkohë një grup qytetarësh janë mbledhur para Drejtorisë së Policisë të Qarkut në Dibër ndërsa kërkojnë lirimin e personave të ndaluar me pretendimin e veprimeve të dhunshme.
Sipas informacioneve paraprake numri i të arrestuarve po vjen në rritje. Ndërkohë forca të shumta policie kanë rrethuar KZAZ nr. 19. Nga ana tjetër mbështetës të Partisë Demokratike Dibër po protestojnë para policisë për lirimin e personave të shoqëruar.
