Presidenti Ilir Meta u shpreh se vendimmarrja për anullimin e zgjedhjeve më 30 qershor kishte si synim t’i afronte palëve për një zgjidhje, si dhe për të ndihmuar në përpjekjet për dialog të kryeministrit Edi Rama i kishte shkruar 7 letra të gjata kreut të PD-së, Lulzim Basha.
Duke iu referuar vendimit të djeshëm të Kolegjit Zgjedhor, e cila rrëzoi kërkesën e PUK për t’u çregjistruar nga procesi imagjinar i 30 qershorit dhe nuk ka lidhje me dekretin për anullimin e zgjedhjeve.
“Kolegji Zgjedhor nuk mund të shqyrtonte dekretin e Presidentit të Republikës. Institucioni i Presidentit nuk është thirrur si palë në këtë proces nga kjo gjykatë, dhe për rrjedhojë nuk mund të prodhojë asnjë ndryshim përsa i takon dekretit”, tha Meta.
Ndërsa e ka cilësuar procesin në 30 qershor si të paligjshëm dhe imagjinar, Meta tha se ky është një operacion propogandistik, por nuk prek aspak dekretin e Presidentit.
Vendimi, sipas Presidentit, është marrë në kushtet e shantazhit dhe presioneve.
“Jemi në një situatë paradoksale. Vendimi i Kolegjit një truk procedurial”, tha Meta, duke shtuar se vetëm Kushtetuesja mund të shqyrtojë ligjshmërinë e dekretit të Presidentit.
Meta i ka bërë thirrje mazhorancës që të tërhiqet dhe të heqë dorë nga presionet ndaj institucioneve të pavaruara.
“Mazhoranca të tërhiqet nga paligjshmëria, presionet dhe shantazhet. E vetmja rrugë për zgjidhjen e krizës mbetet vetëm dialogu politik”, tha Meta.
