Shtyrja e vendimit nga ana e Gjykatës së Arbitrazhit Sportiv ka prishur ndjeshëm qetësinë në kampin korçar. Pikërisht sot (21 qershor), Skënderbeu duhet të merrte verdiktin përfundimtar për dënimin 10-vjeçar të dhënë nga UEFA, por situata u përmbys nga një njoftim i momentit të fundit.
E megjithatë, jo të gjithë e shohin negativisht faktin se fjala e fundit nga Lozana do të vijë më 12 korrik, të paktën nga ana juridike. Të këtij mendimi janë edhe dy ikonat e klubit bardhekuq, Teodor Vaso dhe Dhimitraq Xhambazi.
Në një prononcim të dhënë për “Panorama Sport”, ata kanë theksuar se KAS-i ka kërkuar më shumë kohë për të argumentuar vendimin, i cili ka shumë të ngjarë që të jetë në favor të klubit.
Por, nuk ngurrojnë që të radhisin edhe faktorët negativë. Mungesa për të tretin vit radhazi në kompeticionet europiane mund të ndikojë edhe në anën moral të ekipit dhe mentalitetin e krijuar me aq mund gjatë dekadës së fundit. Por, shqetësimi më i madh duket merkatoja. Në një kohë që ekipet e tjera do kenë ndërtuar grupin, korçarët nuk do të kenë më alternativa në treg.
TEODOR VASO
Ish-lojtari i Kombëtares është i mendimit se vendimi që pritet më 12 korrik do të jetë përcaktues për sezonin e ri në Korçë dhe vijimin e projektit te Skënderbeu. Ndërsa, nga ana tjetër, vonesa në dhënien e një përgjigje është në dëm të ekipit për përgatitjen e sezonit të ri.
“Ishte një lajm i befasishëm, pasi të gjithë ishin gati për të mësuar vendimin final. Optimizmi ishte në majë dhe të gjithë mendonin se pritja mori fund, por nuk ishte kështu. Skënderbeu mbeti edhe një sezon pa Europë. Mungesë që vjen për të tretin vit e normalisht që do të ketë ndikimet e veta si në financa, ashtu edhe në mentalitet për Skënderbeun.
Besoj se do të ishte më e favorshme për ekipin që të hynte në Europë edhe për ego apo për të ngritur moralin e lojtarëve. Moral, i cili është në limite dhe normalisht Skënderbeu e ka humbur disi mentalitetin fitues”, theksoi Teodor Vaso.
