Brenda 10 ditësh mund të mbyllet procedura për shkarkimin e Presidentit Ilir Meta, u shpreh ministrja e Mbrojtjes Olta Xhaçka.
Në emisionin “I Ftuari” në A2 CNN, Xhaçka u shpreh se nisma ka kaluar në Komisionin e Ligjeve dhe procedura mund të jetë më e shpejtë sesa u parashikua.
“Sot për sot, kërkesa e deputetëve firmëtarë i ka shkuar Komisionit të Ligjeve. Komisioni i Ligjeve shqyrton kërkesën e deputetëve paligjshmëritë, antikushtetutshmërinë e veprimeve të presidentit. Më pas Komisioni e kthen ose i bën kërkesë Parlamentit të votojë shkarkimin e presidentit. E gjitha mund të ndodhë në një javë ose 10 ditë. Nuk ka pse të ketë Komision Hetimor. Mund ta bëjë dhe Komisioni i Ligjeve. Ndoshta do të thërrasë dhe vetë Presidentin, kam përshtypjen të hënën. Më pas Komisioni del me një vendim që ja dërgon Kuvendit. Procedura është më e shpejtë nga sa e parashikuat ju”, u shpreh Ministrja e Mbrojtjes, Xhaçka.
Megjithatë, sipas Kushtetutës, vendimtare është verdikti i gjykatës Kushtetuese që përcakton nëse Presidenti duhet shkarkuar apo jo. Aktualisht, në vend, Gjykata Kushtetuese është inekzistente.
