Pas largimeve të dy mbrojtësve, Skënderbeu duket se ka hedhur sytë nga merkatoja për të përforcuar repartin defensiv të ekipit.
Me Kristi Vangjelin, që ende nuk dihet se nëse do të kthehet nga Australia apo jo dhe Bruno Lulajn e larguar te Kukësi, korçarët janë hedhur në sulm për të gjetur zëvendësuesit e tyre. I pari që shkon në mendjen e drejtuesve korçarë, nga sa bëjnë me dije burimet, është mbrojtësi lezhjan, Ditmar Bicaj.
Me Bicajn që tashmë i ka përfunduar kontrata te Teuta, Skënderbeu mund të gjejë shumë thjesht akordin, pasi raportet mes palëve vijojnë të jenë të mira. Rikthimi i Bicajt do të jetë një garanci më shumë në mbrojtje, por që gjithsesi emri i tij është ende një hipotezë dhe bisedimet nuk kanë filluar akoma. Në anën tjetër, rikthehet të paktën zyrtarisht në Korçë sulmuesi i krahut, Enis Gavazaj. Kosovari sapo ka mbyllur huazimin njëvjeçar jashtë vendit dhe nuk ka mundur të bindë klubet respektive për ta mbajtur në ekip.
Në kushte të tilla, Gavazaj duhet të bëjë kthimin fillimisht në shtëpi. Me shumë mundësi, për disa javë minimumi, Gavazajn mund ta shohim me fanellën e Skënderbeut në stërvitje, derisa klubi të vendosë nëse do të kërkojë një tjetër sistemim për lojtarin apo do të zgjedhë të mbajë në ekip një nga heronjtë e edicionit më të suk sesshëm të Skënderbeut. Fakti është se nëse arrihet akordi me Ilir Dajën, nuk është çudi që edhe Gavazaj të mbetet në Korçë si një prej të “përkëdhelurve” të trajnerit kryeqytetas në kohën kur ka qenë pjesë e Skënderbeut.
GRUMBULLIMI – Skënderbeu po mendon seriozisht për grumbullimin e ekipit nesër në “Tropikal Resort”, duke filluar kështu përgatitjet për sezonin e ri. Mes shumë largimesh dhe dilemash, korçarët duket se do ta nisin me mangësi të mëdha ditën e parë të grumbullimit, duke qenë se disa lojtarëve u ka përfunduar kontrata e huazimit, por ka edhe nga ata që janë larguar zyrtarisht në një ekip të ri, siç është rasti i Kristi Vangjelit dhe Bruno Lulajt.
Bardhekuqtë e Skënderbeut kanë filluar të mendojnë për të “izoluar” lojtarët e tjerë që janë në skadencë kontrate me ekipin korçar. Për të mos rrezikuar largime të tjera, duket se Skënderbeu dhe drejtuesit e klubit kanë bërë ftesa për të gjithë futbollistët që janë pa kontratë dhe që kanë mbyllur sezonin me Skënderbeun.
Të gjithë këta lojtarë klubi i ka njoftuar që të jenë prezent në grumbullimin e ekipit për të biseduar rreth një mundësie të re për rizgjatjen e kontratës. Këta futbollistë, mes të cilëve edhe Leonit Abazi, Marko Radas, Gjergj Muzaka dhe Oto Xhon, janë njoftuar për të qenë në ditët e para të grumbullimit pranë skuadrës.
Lojtarë këta që do të kompletojnë më pas grupin edhe me elementë të tjerë që kanë një kontratë të vlefshme me Skënderbeun. Në të tilla kushte, së bashku me 9 lojtarët që kanë një kontratë me Skënderbeun, do të bashkohen edhe të tjerë futbollistë.
