Pjerin Ndreu, ish-deputet i PS-së, i kapur në përgjimet e Bild, ka ndërhyrë përmes linjës telefonike në emisionin Opinion duke tentuar të mbrojë veten nga ajo që është publikuar.
Ndreu tha se i kishte kërkuar votën jo drejtorit të shkollës, por kryetarit të PS-së në Reç.
“Unë kam të drejtë t’i kërkojë votën hapur një anëtari të PS-së, unë nuk i kam thënë drejtorit të shkollës”, tha Ndreu, duke bërë lojra fjalësh, por që është ngatërruar me këmbët e tij.
Ndreu ka shitur publikisht drejtorin e Drejtorisë Arsimore në Dibër, i cili ka ushtruar presione ndaj Reshat Elezit, që ishte drejtor shkolle, dhe që nga Ndreu duhej të deklaronte hapur votën.
“Unë mbaj përgjegjësi për ato që them unë, jo për ato që ka thënë Drini Gjeçi”, tha Ndreu, duke ia lënë përgjegjësinë drejtorit të Arsimit, për komunikimet që ka pasur ai me Reshat Elezin.
Ndreu tha se prokuroria nuk ka kryer detyrën dhe prokurorët duhet të merren të pandehur sepse nuk kanë kryer detyrën. Sipas kandidatit të Rilindjes në Lezhë, prokurorët duhej të hapnin çështjen penale në vend, por janë përdorur politikisht.
“A më keni parë mua duke blerë vota”, u shpreh Ndreu, duke shtuar se “unë flas për përgjimin tim”.
