Kryeministri Edi Rama prej disa javësh akuzon opozitën se ka frikë nga reforma në drejtësi ndaj nuk futet në zgjedhje dhe kërkon destabilizimin e situatës.
Në një krizë të thellë politike, Rama shprehet se frika nga reforma detyron opozitën që të protestojë.
Por në një postim në rrjet, Agron Duka, kryetar i PAA-së, dhe aleat i Lulzim Bashës, ka thumbuar Ramën duke postuar në rrjet një foto me fermerë që hedhin prodhimet e tyre në lumë.
“Nuk është ‘frika nga reforma në drejtësi’ që po shtyn fermerët të hedhin mundin e një viti në lumenj e kanale.
Është mungesa e orientimit, e tregut, e subvencioneve.
Mungesa e vëmendjes nga ana e qeverisë, e cila ka kohë që merret vetëm me mbijetesën e saj politike dhe jo me sektorin më jetik për ekonominë shqiptare”, shkruan Duka.
