Raste të shumta mbifaturimesh të faturës së ujit muajit e fundit kanë bërë që prokuroria të nis hetimin ndaj ujësjellësit Tiranë. Në prokurorinë e Tiranës janë depozituar raste nga qytetarët, të faturave të kripura nga ujësjellësi. Edhe Ujësjellësi ka depozituar në prokurori padi për ndërhyrje të paligjshme në sistemet kompjuterike.
Burimet e Prokurorisë thanë se “pas konstatimit se objekti i kallëzimit dhe ai i materialeve të tjera referuese ishte i njëjtë, është vendosur bashkimi i të gjitha shkresave në një procedim penal”. Pas kësaj faze të ezauruar tashmë nga Prokuroria, grupi i hetimit ka nisur veprimet me qëllim zbardhjen e mekanizmit të anomalisë së ndodhur me sistemin informatik të Ujësjellësit të Tiranës. Paraprakisht mësohet se është hedhur poshtë mundësia e “ndërhyrjes nga jashtë” pasi sistemi i faturave të UKTsë nuk ka ekspozim online apo në rrjete publike. Për këtë arsye, dyshimet paraprake janë se ndërhyrja mund të jetë kryer “nga brenda” UKTsë për arsye që ende nuk janë të qarta.
