Egzon Belica dhe Sodiq Atanda mbeten pa kontrata në përfundim të sezonit dhe klubi iu premtoi rinovimet dhe mësohet se së fundmi janë zhvilluar edhe bisedimet e para me dy qendërmbrojtësit.
Për Belicën drejtuesit nuk kanë vuajtur për ta bindur, pasi vetë strugani ka pasur dëshirë që të mbetet i kuq. Por, në rastin e Atandës, mësohet se drejtuesit kanë mbetur pa fjalë nga rroga “e çmendur” që ka kërkuar nigeriani. “Panorama Sport” ka arritur të zbulojë se Sodiq Atanda ka kërkuar një rrogë vjetore mbi 70 mijë euro plus bonuse, kërkesë e cila është dukur e parealizueshme nga Partizani.
Drejtuesit i kanë dhënë ofertën e tyre nigerianit dhe i kanë lënë kohë që të mendohet. Ndërsa Egzon Belica konsiderohet si pjesë e “demave” edhe për sezonin e ri. Atanda me shumë mundësi ka gjetur destinacion të ri dhe me rrogën që i ka kërkuar Partizanit, ka dashur ta maksimalizojë përfitimin e tij.
