Kryeministri Edi Rama e ka konsideruar nul në aspektin ligjor dekretin e Presidentit Ilir Meta për anullimin e zgjedhjeve më 30 qershor.
Rama, gjatë një takimi në Burrel, ku ka prezantuar kandidatët për kryebashkiakë të Klosit dhe Burrelit, tha se Ilir Meta u shfaq si shpëtimtari politik i atyre që protestojnë në boulevard dhe bëhen gjithmonë e më pak pas çdo proteste.
“I keni parë, bëhen gjithmonë e më pak pas çdo proteste, zgjaten në boulevard si puna e çimçakizit”, tha Rama, duke e cilësuar Ilir Metën si shpëtimtarin e atyre që kanë mbetur në rrugë.
Por Rama tha se kjo nuk do të jetë çmenduria e fundit, ndërsa paralajmëroi se ata që sot bërtasin “Rama ik” do të ikin vetë një nga një.
Me një ton kërcënues dhe paralajmërues, Rama tha se e drejta e Ilir Metës për të qëndruar në atë zyrë, ka marrë fund. Në këtë mënyrë duket se kryeministri ka paralajmëruar shkarkimin e Ilir Metës nga posti i Presidentit.
