Mbi 230 media ndërkombëtare në faqet e tyre online kanë raportime mbi zhvillimet në Shqipëri, e cila prej 4 muajsh ndodhet në një krizë politike.
Prej 16 shkurtit kur opozita nisi valën e protestave kundër Edi Ramës duke kërkuar largimin e tij si kryeministër dhe krijimin e një qeverie tranzitore që do të përgatisë zgjedhjet e parakohshme parlamentare, janë zhvilluar 8 protesta kombëtare në Tiranë, dhe dhjetra protesta të tjera më të vogla në të gjithë vendin.
Opozita ka djegur mandatet e deputetëve dhe nuk u regjistrua për zgjedhjet vendore. Në anën tjetër kryeministri Edi Rama ka mbajtur një qëndrim mospërfillës, madje duke deklaruar se zgjedhjet do të bëhen më 30 qershor, pavarësisht kërkesave të opozitës.
Rama akuzon opozitën se ka frikë nga zgjedhjet dhe reforma në drejtësi, por mediat ndërkombëtare si Zëri i Amerikës dhe më pas BILD kanë publikuar përgjime të autorizuara nga Prokuroria shqiptare, ku zyrtarë të Rilindjes janë kapur në biseda me grupe kriminale lidhur me ndikimin në zgjedhje.
Qeveria dhe Rilindja janë përpjekur të zhvlerësojnë përgjimet dhe përmbajtjen e tyre, ndërsa shqetësimi më i mad hi tyre, por edhe i Prokurorisë është se kush i ka nxjerrë dokumentet që përfshihen në dosjen e njohur si 339.
Një ditë më parë, Presidenti Ilir Meta vendosi që me anë të të dekreti të veçantë të anullojë 30 qershorin si ditën e zgjedhjeve.
Vendimi është përshëndetur nga opozita, por jo nga mazhoranca, që vijon edhe sot fushatën se idenë se zgjedhjet do të mbahen në këtë datë.
Mungesa e Gjykatës Kushtetuese e komplikon edhe më shumë ngërçin politik dhe juridik, pasi asnjë nga palët nuk mund të interpretojë nëse Presidenti ka apo jo të drejtë të rrëzojë një datë zgjedhjesh të dekretuar nga ai vetë.
Por precedentët e mëparshëm, kur zgjedhjet janë shtyrë, qoftë në 2007 ashtu edhe në 2017, mund të shërbejnë si argumenta që procesi mund të shtyhet, aq më shumë kur kriza politike aktualisht është ndër më të fortat.
Përmes një deklarate, presidenti Meta renditi 5 arsyet pse vendosi të ndërmarrë vendimin ndërsa informon se më 10 qershor, Institucioni i Presidentit të Republikës do të bëjë publikisht me dije të gjithë argumentat shteruese kushtetues, ligjorë dhe logjikë që çuan në marrjen e këtij vendimi.
Zhvillimet në Shqipëri kanë tërhequr vëmendjen e mediave ndërkombëtare jo vetëm europiane, por edhe amerikane.
‘New York Times’, ‘Washington Post’, ‘Abc’, ‘AP’, ‘Daily Mail’, Reuters, Foxnews, kanë pasyqruar zhvillimet në orët e fundit, duke pasur në vëmendje jo vetëm protestën e opozitës, por edhe qëndrimin e Presidentit.
