Protesta e 8 kombëtare e opozitës, thirrur këtë të shtunë në Tiranë, ka bërë që policia të kalojë në gatishmëri. Sipas burimeve jozyrtare nga policia, për mbarëvajtjen e saj do të angazhohen rreth 1700 efektivë.
Deri në përfundimin e protestës, Kryeministria, Parlamenti dhe Ministria e Brendshme do të jenë të rrethuara me kordon policie.
Brenda këtyre selive do të jenë forcat speciale dhe punonjës të Gardës. Nëpër shtylla pranë institucioneve janë vendosur kamera me rezolucion të lartë, për identifikimin e personave që mund të ushtrojnë dhunë. Ndërsa oficerë të tjerë do të jenë të angazhuar për të identifikuar persona të cilët mund të mbajnë maska, apo hedhin mjete piroteknike në drejtim të policisë.
Te parlamenti, Policia ka marrë masat duke rrethuar godinën me tela me gjemba, ndërsa makina e ujit është parë të futet brenda rrethimit për të furnizuar me ujë autobotet e policisë. Gazi lotsjellës, i përdorur nga policia në protestat e mëparshme në rast përshkallëzimi, nuk mungon as këtë herë.
Lidhur me organizmin e protestës, pritet që kryetari i opozitës të mbajë një fjalim, ndërsa protestuesit të tubojnë para kryeministrisë dhe parlamentit. Sipas Partisë Demokratike, rreth 70 mijë qytetarë janë nisur nga rrethet pasditen e sotme në drejtim të Tiranës, për t’u bërë pjesë e protestës së tetë të opozitës.
Opozita kërkon largimin e kryeministrit Edi Rama dhe një qeveri tranzitore si kusht për zgjedhje të lira e të ndershme.
