Mbi 20 komisarë dhe nënkomisarë, kryesisht me funksione në seksionin e krimeve, trafiqeve, antidrogës, janë lëvizur nga funksionet e tyre.
Raportohet se lëvizjet kanë të bëjnë me organizimin e ri të punës në rradhët e policisë. Ndryshimet kanë përfsirë Drejtorinë e Policisë së Tiranës, ku nuk përjashtohet që një nga arsyet që ka ndikuar në lëvizjet e kryera të jenë edhe protestat e vazhdueshme qytetare, që kërkojnë largimin e Edi Ramës nga posti i kryeministrit.
Janë plot 8 nënkomisarë dhe 13 komisarë që me firmën e Rebani Jaupajt, kreut të policisë së Tiranës, janë lëvizur nga një pozicion në tjetrin, disa duke u promovuar në detyra dhe të tjerë duke zbritur shkallët e karrierës.
Ndërkohë po shqyrtohen gjithashtu lëvizjet e së paku 20 punonjësve të policisë, që do të transferohen nga një funksion në një tjetër, brenda strukturës së policisë së Tiranës. Disa nga ndryshimet e ndodhura janë argumentuar me respektimin e gradave në rradhët e policisë.
Raportohet se Julian Qyta, me gradën komisar, është emëruar Shef i Seksionit të Patrullës së Përgjithshme në Komisariatin numër 3. Në këtë funksion ai zëvendëson Arben Eshja, i cili ka kaluar specialist për kordinimin në sektorin për krimet, në drejtorinë e Tiranës.
Alban Hoxha me gradën nënkomisar, i cili mbante funksionin e shefit të Seksionit të Kërkimit në drejtorinë e Tiranës, ka zbritur shkallë në karrierë, ndërsa është emëruar specialist për krimet në komisariatin numër 4.
Në vend të tij në Drejtorinë e Policisë së Tiranës është emëruar Mariglen Beqo, me gradën komisar, i cili ka mbajtur më parë funksionin e specialistit të antidrogës.
Sokol Myrtaj, me gradën nënkomisar, është transferuar nga komisariati nr 6 ku drejtonte seksionin për hetimin e krimeve të hapura, në komisariatin nr 2, ku do të jetë specialist për krimet.
Në vend të tij në komisariatin nr 6 ka kaluar, Osman Fuçija, me gradën komisar, i cili më parë ishte specialist i krimeve të rënda në drejtorinë e Tiranës.
Skerdi Kasimati nga pozicioni i shefit të Seksionit të trafiqeve të paligjshme në drejtorinë e Tiranës, është transferuar në komisariatin e Vorës, ku do të drejtojë seksionin e krimeve.
Ndërkohë që pozicionin e tij në Drejtorinë e Tiranës e ka zënë Gjergj Nikolla, me gradën komisar, i cili më parë ka qenë specialist në të njëjtën drejtori, por në seksionin e luftës kundër korrupsionit.
Olti Demiraj me gradën komisar, është emëruar zv/shef i komisariatit numër 5, ndërsa më parë mbante detyrën e specialistit të krimit ekonomik. Flobenz Karagjozi ka zbritur shkallë në karrierën policiore pasi nga shef Seksioni për krimet në Komisariatin numër 1, ka kaluar specialist për krimet në Komisariatin 3. Ai mban gradën e nënkomisarit.
Karagjozi është zëvendësuar në komisariatin nr 2 nga Gjergj Tola, i cili nga specialist për krimet në komisariatin nr 2, ka kaluar Shef Seksioni për krimet në komisariatin nr 1.
Ermal Zenelaj, me gradën komisar, është rritur në detyrë ku nga specialist ka kaluar në shef i seksionit për Krimet në komisariatin nr 4.
Ndryshime ka pësuar edhe sektori i antidrogës në Tiranë, ku Krenar Guçe, është transferuar në Drejtorinë e Policisë së Tiranës.
Jetnor Xhaferri me gradën nënkomisar është zëvendësuar nga Saimir Shkambaj me gradën komisar në pozicionin e Shef Seksioni i Operacioneve Speciale në Drejtorinë e Tiranës. Xhaferri me lëvizjet e fundit ka kaluar specialist për krimet në Drejtorinë e Tiranës, duke bërë rokadë me Shkambajn.
