“Nuk jam duke folur me Astrit Avdylajn. Në të pestë përgjimet është Astrit Avdyli që po flet në telefon, ndërsa i gjashti nuk është Astrit Avdyli.
Unë po ju sfidoj, gjejeni ju me kë po flas, por unë po ju them, që nuk flas me Avdylin. Unë po flas me një person tjetër, por jo me atë që thuhet”.
Kështu deklaroi mbrëmjen e sotme në Opinion, Vangjush Dako, duke dhënë versionin e tij lidhur me përgjimet e publikuara nga BILD, një ditë më parë.
Dako tha se prokuroria e ka marrë në pyetje për 5 orë, ka sekuestruar dosje dhe detaje që ata mendojnë, po hetojnë dhe ndaj meje nuk ka asnjë përgjegjësi penale.
Ai tha se është i gatshëm të përballet me çdo pasojë ligjore nëse provohet se ka folur me Astrit Avdylajn.
“Në përgjimin ku ju thoni se unë flas me Avdylin, unë ju them se po flas me një person tjetër. Në 5 përgjimet e tjera është Avdyli që flet me ata që thuhet, një mendje e hollë ka bërë manipulimin”, tha Dako, duke shtuar se prokuroria mund të ketë gabuar.
I pyetur sepse është përgjuar ai nga prokuroria, përderisa nën hetim ka qenë Astrit Avdylaj, Dako tha se mundet që numri i Avdylajt mund të jetë përdorur nga një person tjetër.
