Gazetari i “Bild”, Peter Tiede, i cili publikoi përgjimet e fundit që provojnë edhe më shumë shit/blerjen e votave në Durrës dhe Shijak, ku protagonist janë Vangjush Dako, Avdylajt dhe disa funksionarë lokalë të Rilindjes, ka reaguar sërisht në rrjetet sociale lidhur me materialin e publikuar.
Në reagimin e fundit, gazetari gjerman ironizon zyrën e Prokurores së Përgjithshme, e cila me deklaratën e saj për nisjen e hetimit për nxjerrjen e sekretit hetimor, thjesht ka konfirmuar vërtetësinë e përgjimeve.
“Për shkak se Shqipëria është përmbysur përsëri për shkak të një artikull timin dhe shpirtrat e këqinj të qeverisë po përpiqen të më nxjerrin gënjeshtar, unë i jam veçanërisht mirënjohës Zyrës së Prokurorit të Përgjithshëm në Tiranë, e cila, konfirmon qartë vërtetësinë e përmbajtjes së regjistrimeve të përgjimit, të cilat i kemi bërë publike sot.
Zyra në fjalë paralajmëron të bëhet kujdes në publikimin e përgjimeve (regjistrimeve audio), pasi bëhet fjalë për materiale nën hetim dhe të Prokurorisë”, shkruan Peter Tiede.
Publikimet e 6 përgjimeve në të përditshmen BILD kanë shkaktuar një seri reagimesh në Tiranë, përfshi këtu edhe Prokurorinë e cila pohoi se po heton zyrtarë, për të cilët ka dyshime se janë përfshirë në korrupsionin zgjedhor.
Deri më tani nuk ka një reagim nga ana e kryeministrit Edi Rama, i cili ka marrë në mbrojtje Vangjush Dakon më herët, kur përgjimet e dosjes 339, u publikuan nga Zëri i Amerikës.
Nuk dihet nëse Rama do të vijojë të mbajë të njëjtin qëndrim, apo do të tentojë të kalojë në heshtje edhe këtë situatë.
