Rreth 2 muaj pas aksidentit tragjik në autostradë në Kavajë ku humbën jetën 2 fëmijë, Gjykata vendos se nuk ka fajtorë duke liruar nga qelia dy zyrtarë të Autoritetit Rrugor Shqiptar.
Ata ishin arrestuar pas aksidentit të 7 majit në aksin Qerret-Plepa.
Fëmijët 3 dhe 5 vjeç ndërruan jetë, pasi automjeti ku udhëtonin u përplas në një vend ku barriera metalike mbrojtëse e rrugës ishte hapur për të krijuar rrugë drejt një pike karburanti.
Drejtorët e Autoritetit Rrugor Shqiptar, Bib Gjomakaj dhe Lek Tushaj, janë liruar nga masa “arrest në burg” me një vendim të Gjykatës së Apelit. Ata qëndronin prej më shumë se një muaji në masën “arrest në burg” për akuzën e “shpërdorimit të detyrës”. Bëhet e ditur se në seanca të zhvilluara gjatë ditëve të fundit, Apeli ka vlerësuar se ekzistojnë kushtet ligjore për ndryshimin e masës së tyre, shkruan sot Panorama
Bazuar në pretendimet e paraqitura nga palët, Apeli ka vlerësuar si masë të përshtatshme për dy zyrtarët atë të “detyrimit për paraqitje në organet e Policisë Gjyqësore”.
Drejtorët e ARRSH-së, Gjomakaj e Tushaj, u arrestuan në lidhje me përgjegjësinë për lënien hapur të barrierës mbrojtëse anësore metalike të rrugës në afërsi të një pike karburanti, ndonëse një vendim gjyqësor urdhëronte mbylljen e saj. I treti zyrtar i ARRSHsë i arrestuar për të njëjtën ngjarje ishte Dritan Fejzo, ishdrejtori juridik i institucionit. Fejzo, i dyshuar për të njëjtën vepër penale si kolegët e tij, u lirua nga qelia në 21 qershor përmes një vendimi të Gjykatës së Tiranës. Kjo Gjykatë pranoi kërkesën e Prokurorisë për caktimin e masës “arrest shtëpie” ndaj tij, vijon më tej Panorama.
PROKURORIA
Spas Prokurorisë, aksidenti rrugor nuk do të shoqërohej me pasojën tragjike të vdekjes së dy të miturve, nëse barriera anësore e rrugës në vendin e ngjarjes nuk do të ishte ndërprerë. “Prokuroria e Kavajës dyshon se pasojat e aksidentit rrugor do të ishin më të vogla, nëse siguria rrugore e aksit ku ka ndodhur ngjarja do të ishte më e lartë.
Nga praktika dokumentare rezulton se hapësira ndërmjet guardarelave është pranë një pike karburanti. Kjo e fundit, gjatë ndërtimit të rrugës në vitin 2011, ka aplikuar disa herë tek Autoriteti Rrugor për t’i krijuar hapësirë që mjetet të hynin e dilnin nga rruga kryesore në pikën e furnizimit të karburantit”, thuhej në dosjen e Prokurorisë.
Pas një beteje në rrugë gjyqësore, në maj 2016, Apeli Administrativ urdhëronte Autoritetin Rrugor Shqiptar të vijonte procedurat për mbylljen e hapësirës me guardarelave, si dhe të merrte masat për sigurinë rrugorë ne segmentin ku ndodhi aksidenti. S
ipas Prokurorisë, vendimi i Gjykatës së Apelit Administrativ është marrë në vitin 2014 dhe deri në ditën e aksidentit tragjik të datës 08.05.2016, nuk janë marrë masat përkatëse si për plotësimin e hapësirës ndërmjet guardarelave, ashtu edhe për rritjen e sigurisë rrugore në këtë pjesë të aksit rrugor.
