Nga Boldnews.al
Piter Tide, gazetar i “Bild”, të përditshmes gjermane, ka paralajmëruar publikimin e 6 përgjimeve të reja mbi shit-blerjen e votave në Durrës e Shijak.
“Kam një histori të re, do të botohet sonte ose nesër në mëngjes e cila flet për Shijakun dhe Durrësin. Blerje votash nga ana e Partisë Socialiste me gjashtë regjistrime të plota. Përgjime telefonatash në shqip dhe përkthyer në anglisht. Ne do të kemi gjashtë regjistrime në gjuhën shqipe në faqen tonë të internetit, shembuj nga rasti i Astrit Avdylit. Telefonata të bëra me politikanë dhe votues”, tha gazetari gjerman.
Boldnews.al ka mësuar se përgjimet janë në dosjet e Prokurorisë, më konkretisht asaj që njihet si dosja 339/1, që sipas burimeve zyrtare nga organi i akuzës, janë në hetim dhe po vijon zbardhja e cd-ve.
Një nga përgjimet pritet të jetë biseda që ka pasur kryebashkiaku aktual Vangjush Dako, emri i të cilit rezulton edhe në përgjime të tjera që zotërohen nga prokuroria, por që është marrë në mbrojtje, ashtu si edhe ish-ministri i Brendshëm, Saimir Tahiri, nga kryeministri Edi Rama.
Përgjimet e reja që pritet të publikohen mëngjesin e së mërkurës më shumë sesa do të ndezin situatën politike në Shqipëri, pritet të krijojnë një tjetër vorbull në kancelaritë europiane, më konkretisht në Budestagun gjerman, por edhe në Bruksel.
Gjermanët duken shumë më të angazhuar në krizën politike që ka përfshirë Shqipërinë prej 16 shkurtit, kohë kur nisi publikimi i përgjimeve të para mbi atë që njihet tashmë si shit-blerja e votës.
Nga Gjermania ka pasur sinjale të qarta për të zbardhur fenomenin, personat përgjegjës të dalin para drejtësisë dhe prokuroria të bëjë detyrën e saj, pra të mos vijojë të heshtë përballë fakteve që po publikohen jo vetëm në mediat shqiptare, por edhe ato ndërkombëtare.
Deri më tani kryeministri Edi Rama ka zgjedhur të mbrojë zyrtarët e Rilindjes të kapur në përgjime, qofshin në Durrës ashtu edhe në Dibër, ndërsa logjika e thjeshtë të çon në atë që kreu i qeverisë po ruan të vetët për të mbrojtur veten.
Derfi më tani Rama ka zgjedhur t’i cilësojë përgjimet e publikuara jo prova dhe fakte, duke luajtur me argumentin që askush nuk mund të dënohet sepse dy apo më shumë njerëz, kapen në përgjime duke përmendur emra zyrtarësh.
Nëse nesër në 6 përgjimet e reja, del kryebashkiaku Dako që komunikon direkt, atëherë kryeministrit i digjet edhe alibia që dy apo 3 individë, me apo pa precedent, i përgojojnë zyrtarë të Rilindjes, apo i përbaltin ato.
Duket se fishekët që Rama ka përdorur deri më tani për të mbrojtur kryebashkiakun, që është një prej bashkëpunëtorëve më të rëndësishëm të kryeministrit po mbarojnë.
Nuk dihet nëse me një situatë të tillë, Rama do të zgjedhë së pari të shesë Dakon, dhe më pas të lëshojë karrigen, apo do t’i shkojë deri në fund që bashkë me humbjen e karriges të lëshojë edhe kryebashkiakun me “duart si akullore” dhe “superman”.
