Nga Boldnews.al
Prokuroria ka dërguar për gjykim dosjen për 51 të pandehurit e operacionit të koduar “One if by Land”. Ata akuzohen për veprat penale të “Ndihmës për kalim të paligjshëm të kufijve” më shumë se një herë, kryer në formën e grupit të strukturuar kriminal, krijimit dhe pjesëmarrjes në grup të strukturuar kriminal.
Operacioni ”One if by Land” është finalizuar në 18 Mars të vitit 2018 me 39 arrestime dhe 12 persona të shpallur në kërkim, si dhe sekuestrimin e një sërë provash materiale.
Hetimet
Hetimet e kryesuara nga prokurori Eugen Beçi, kanë nisur në vitin 2017, pas referimit në Prokurorinë e Krimeve të Rënda të materialeve hetimore nga Sektori për Hetimin e Trafikut të Paligjshëm në Policinë e Shtetit, për një grup kriminal që ushtronte veprimtarinë kriminale atë të dhënies ndihmë për kalimi të paligjshëm të kufirit.
Në hetime janë përdorur vëzhgime, filmime, fotografime dhe përgjimi i numrave të telefonit të subjekteve nën hetim.
Sipas hetimeve: Grupi kriminal e kishte shtrirë aktivitetin e tij jashtë territorit të Shqipërisë si në Maqedoni, Bullgari, Kosovë Slloveni, Itali, Spanjë, Portugali, Francë, Irlandë deri në vendet e Amerikës Latine. Grupi, në fokus të veprimtarisë së tij kishte dhënien ndihmë për kalim të paligjshëm të kufirit kundrejt pagesës shtetasve që dëshironin të emigronin në mënyrë të paligjshme kryesisht në shtetet si Irlandë Mbretëri e Madhe, SHBA/Kanada, shtete në të cilat vetëm me viza mund të udhëtosh. Shtetasit që dëshironin të emigronin në mënyrë të paligjshme kundrejt pagesave ishin shtetas shqiptar.
Mondus operandi – Në dosjen hetimore depozituar gjykatës janë zbardhur edhe metodat që grupi kriminal përdorte për të realizuar kontrabandimin e personave kundrejt pagesave.
Sipas hetimeve: Fillimisht pasi arrihej të binin dakort për shumën e pagesës, e cila varion nga 7000 deri në 9000 paund për në Mbretërinë e Bashkuar dhe 25.000 deri në 30.000 dollarë për në SHBA/Kanada, me personat që do të emigronin në mënyrë të paligjshme, anëtarët e grupit kriminal merrnin gjeneralitetet e personave, fotografi të tyre dhe dokumentat e identifikimit i dërgonin ose dorazi ose nëpërmjet rrjeteve sociale(ëhatsap, viber) për tek personi që do siguronte/prodhonte dokumentat e udhëtimit të falsifikuara, paralelisht me këtë anëtarët e tjerë të grupit kriminal kryenin rezervimin e linjave të udhëtimit, ajërore, tokësore vajtje–ardhje (në shumicën e rasteve ishin fiktive) si me dokumenta udhëtimi shqiptare ashtu dhe me ato me dokumenta udhëtimi të falsifikuara sipas rastit, duke mbajtur parasysh që shfrytëzoheshin pikat e kalimit kufitare ku kontrollet ishin të dobta. Pjesë e grupit kriminal ishin dhe personat që do të kryenin shoqërimin/ transportimin/pritjen e personave që do të kontrabandoheshin.
Zakonisht shtetasit që do të emigronin udhëtonin me dokumenta shqiptare deri në vendet kryesisht të Bashkimit Europian, ku udhëtimi nuk kërkon vizë. Si shtete tranzit per destinacion final Mbretërinë e Bashkuar, përdoreshin shtetet e BE si Franca, Spanjë, Itali me qëllim për të emigruar në mënyrë të paligjshme, kurse për të emiguruar në mënyrë të paligjshme në drejtim të SHBA/Kanada, janë përdorur si shtete tranzit, Meksika, Panamaja dhe Republikë Domenikane. Shtetasit që do të emigronin në mënyrë të paligjshme, pas mbërritjes në një nga shtetet e mësipërme europiane, futeshin në zonën e tranzitit po në këtë moment fshihnin dokumentat e vërtetat të udhëtimit dhe vini në përdorim dokumentin e falsifikuar të udhëtimit ku kishin bërë dhe rezervimin e biletës së avionit për në destinacionin e dëshiruar si në Angli, SHBA, Kanada.
“Në përgjithësi në rastet që kemi konstatuar, dokumentat e udhëtimit të falsifikuara, ju jepeshin personave që do te emigronin në mënyrë të paligjshme në momentin e fundit kur do të kryenin levizjet në zonën tranzit. Në hetimet e kryera kemi konstatuar dhe kemi pasur dyshime se një pjesë e dokumentave të udhëtimit të falsifikuara siguroheshin në vend kurse pjesa tjetër grupet kriminale i siguronin nga bashkëpunëtorët e tyre jashtë Shqipërisë”, thuhet në dosjen e prokurorisë.
Brenda një viti janë kapur mbi 200 raste ku grupi kriminal ka organizuar kontrabandimin e tyre.
Për shkak të shtrirjes së aktivitetit kriminal të këtij grupi në shumë shtete dhe hetimet janë koordinuar me shumë agjenci ligjzbatuese si D.S.A (Departamenti i sigurise Amerikane, pranë ambasadës Amerikane në Tiranë) SELEC, EUROPOL, INTERPOL.
Të pandehurit
Plot 51 persona janë të pandehur në këtë dosje. Gjykata e Shkallës së Parë për Krimet e Rënda-Tiranë me vendimin datë 16.03.2018 ka caktuar masën e sigurimit “Arrest me burg për 51 shtetas shqiptarë të implikuar, nga të cilët janë ekzekutuar 39 të tillë dhe 12 shtetas janë shpallur në kërkim.
Të pandehurit janë: Sajmir Hysenbelliu, Enxhi Koci, Nike Bushi, Adriatik Çekaj, Alfred Kalaj, Mhill Zefi, Mensur Selami, Bedri Bendaj, Ilir Feçi, Ardian Gurakuqi, Kolë Vushaj, Zaim Hysenbelliu, Nosh Volaj, Prel Gjelaj, Jorgo Shaho, Ardian Corri, Kristjan Zallinaj, Sokol Duli, Euglen Dushku, Leonora Dushku, Roza Frroku, Erenik Avdyli, Blerim Brahimi, Oltjan Serani, Kreshnik Muja, Fatos Muja, Luan Qyrku, Genci Osmanaj, Arben Kajacci, Luigj Shtinja, Tanush Prenga, Përparim Kule, Esat Cakoni, Skënder Koni (KENI), Shkëlqim KOÇI (Jimmy), Borislav Ivanov Krumov, Marin Dimitrov Vasilev, Eno Muccollari, Liri Muccollari, Fuat Zaimi, Nikolin Priska, Haki Tarja, Bashkim Sorra, Ylber Rama, Artur Karaj, Emiljan Sinjari, Ilija Mitrevski, Betim Veliu, Artim Dauti, Zaim Dauti, Genc Dibra.
