Partizani, pas 26-viteve pritjeje, arriti që ta kthejë titullin kampion dhe pas këtij suksesi është thënë se të kuqtë i pret një verë “e nxehtë” në merkato. Synimi është ndërtimi i një skuadre solide dhe të denjë për të bërë një paraqitje pozitive në Kupat e Europës.
Më shumë nga merkatoja pritet në hyrje, ku të shumtë janë emrat e përfolur deri në këto momente. Por edhe sa u përket transferimeve, 2-3 lojtarë shikohen si të mundshëm për të ndryshuar ambient, përkundrejt mbushjes së arkave të klubit.
Jasir Asani- Sulmuesi nga Shkupi është më i përfoluri për të ndryshuar ambient në merkaton e verës. Përveç Turqisë që mbetet një pistë e vjetër, Kazakistani ka dalë si pistë e re për golashënuesin më të mirë të Partizanit në sezonin e fundit. Por dje Jasir Asanit i ka dalë emri në Izrael. Sipas medias izraelite, “sport5.co.il”, në lojë për shërbimet e 24-vjeçarit të Partizanit është Ironi Kiryat Shmona.
Para një viti ky klub izraelit i rrëmbeu Partizanit një nga synimet e merkatos së verës, ish-sulmuesin e Mariborit dhe Kombëtares, Valon Ahmedi. Sipas medias izraelite, Kiryat Shmona ka shitur para disa ditësh Levi Garcia te Betar Jeruzalem dhe Jasir Asani shikohet si zëvendësuesi ideal, ndaj pritet të përcaktohet edhe oferta që do t’i paraqesin Partizanit për shërbimet e 24-vjeçarit.
