Ish-deputeti Luan Baçi, kryetar i degës së PD-së në Fier, i ka dhënë një mesazh të prerë kryeministrit Edi Rama, në prag të protestës së 7-të të opozitës.
Disa mijëra qytetarë të Fierit pritet t’i bashkohen protestuesve nga e gjithë Shqipëria, pasditen e sotme para godinës së Kryeministrisë.
Baçi i ka drejtuar një thirrje Ramës që të heqë dorë nga kërcënimet dhe shantazhet, ndërsa thekson se sot është paralajmërimi i fundit për kryeministrinë.
“Sot Rama merr paralajmërimin e fundit. Aksioni opozitar është në vazhdimësi. Rama bën mirë të jap dorëheqjen dhe të lërë presionet dhe shantazhet.
Të lërë retorikën e tij të sëmurë burg, burg, burg se nuk i tremb dot qytetarët shqiptarë. Çelja e fushatës dhe mënyra e hapjes së saj ishte një fushatë funerali për Rilindjen e tij.
Është mirë të mbledh mendjen e të japë dorëheqjen për të mirën e PS dhe të qytetarëve shqiptarë.
Protestat do vijojnë, kjo e sotmja është më e fuqishme. Do të vijojmë deri në rrëzimin e tij dhe nuk ka asnjë shans të shkojë në zgjedhjet e 30 qershorit”, deklaroi Baçi.
