Sot më 1 qershor, dita e festës së fëmijëve, Nisma #Thurje në facebook ka bërë një postim dedikuar Ardit Gjoklajt, një djalosh 17-vjeçar që humbi jetën teksa punonte në landfillin e Sharrës.
Si gjithë fëmijët e tjerë edhe Arditi kishte ëndrra, shpresë, forcë, por që një mëngjes ia vodhën ata që vjedhin fonde, rrugë, hapësira publike, parqe e gjelbërim. Ia grabitën jetën dhe në këmbim i dha heshtje dhe padrejtësi.
Postimi i plotë:
Sot në 1 qershor zgjedhim të kujtojmë Arditin.
Arditi nuk kishte lodra, ai nuk kishte kohë për to pasi i duhej të zgjohej herët çdo mëngjes për të punuar.
Arditi nuk kishte Iphone e as Samsung. Nuk kishte tableta dhe PlayStation. Ai luante me bidonat e kanaçet kur ulej të pushonte mbasi kishte mbaruar turnin e seleksionimit të mbetjeve te fusha e landfillit.
Arditi nuk kishte veshje firmato e as këpucë komode.
Arditi kishte forcë. Forcë të zgjohej çdo mëngjes dhe ti thoshte jetës “Unë do punoj fort që tia dal, sado ti të mundohesh të më mposhtësh”.
Arditi kishte ëndrra.
Arditi kishte shpresë.
Një mëngjes, ata që vjedhin fonde, rrugë, hapësira publike, parqe e gjelbërim ia vodhën Arditit edhe forcën, edhe ëndrrat edhe shpresën. Ia grabitën jetën.
Në këmbim i dhanë heshtje. Heshtje dhe padrejtësi.
Si Arditi janë mijëra fëmijë në Shqipëri, dikush mbledh kanaçe, dikush gurët e kromit, dikush lyp e dikush qan nga uria.
Drejtësia për Arditin, është drejtësi edhe për ta.
Është mesazhi se ka shpresë, se ka të ardhme.
Ndaj sot, në vend të urimit për 1 qershorin, duam të kujtojmë Arditin dhe të rikërkojmë drejtësi për të!
