Partizanit iu deshën 26 vite që të rikthejë titullin kampion dhe në këtë pritje të gjatë kanë ndikuar disa faktorë. Një nga ata është edhe statusi i të pastrehut.
Në mars të 2020-ës bëhen 10 vite që Partizani ka mbetur pa shtëpi. Ndërtimi i kompleksit të ri është konsideruar si titulli i presidentit Gaz Demi, gjë të cilën e ka pohuar vetë. Por, kjo nuk u finalizua para titullit kampion, ndonëse puna për ndërtimin e shtëpisë së re ka nisur para 3 viteve.
Titulli kampion, por edhe bredhja si “çifuti në shkretëtirë” për të gjetur terrene stërvitore dhe stadium, ua ka mbushur mendjen drejtuesve të kuq se sfida e tyre kryesore e momentit është ndërtimi i shtëpisë së re. Kjo gjë është premtuar nga presidenti Demi dhe drejtori Rama, por në kantierin e hapur qetësia vijon që nga korriku i 2017-ës.
Nga një inspektim në terren, edhe dje në shtëpinë e re të “demave” mbizotëron e njëjta qetësi me terrene të mbuluara me barishte dhe shkurre. Para 4 ditësh, presidenti Demi tha: “Ne që nga ky vit, do i kemi ndeshjet në fushën tonë, ministadiumin tonë të vogël, ku entuziazmi i tifozërisë do jetë më i madh, dhe me ekipin luftarak, ndoshta edhe më mirë se ky vit.
Këtë sezon ne fillojmë stadiumin tonë të ri. Kjo është mbyllur tani, është dhënë premtimi”. Drejtuesit kanë dalë garant se në sezonin e ri ekipi do të luajë në shtëpinë e tij, por duke parë se në terren akoma nuk ka rinisur puna, shtohen pikëpyetjet mbi afatet. Puna voluminoze në kompleks ka përfunduar, fusha kryesore është thuajse gati, ku ka përfunduar edhe procesi i drenazhimit dhe i bie që të vijojnë procedurat për shtrimin e tapetit.
Gjithashtu ka përfunduar ndërtimi i shkallëve të tribunës kryesore, si dhe ndërtesat në funksion të kompleksit kanë mbaruar si karabina. Sipas projektit fillestar dhe afateve të punimeve të publikuara, i binte që më 15 shtator 2017 kompleksi duhet të ishte dorëzuar i përfunduar, por punimet janë zvarritur për shkaqe të ndryshme. Projekti i shtëpisë së re të Partizanit ka ndryshuar disa herë. Për momentin, kompleksi i ri i Partizanit parashikohet të përmbajë brenda një stadium me 5-6 mijë vende, 2 fusha stërvitore, hotelin dhe ambiente shërbimi.
