Shtatë anëtarë të një familjeje kanë mbetur të plagosur pasditen e sotme në një aksident të ndodhur në aksin Sarandë-Gjirokastër, në vendin e quajtur Qafa e Muzinës.
Mësohet se automjeti tip golf 3 ku ndodheshin 7 persona të gjithë me mbiemër Lleshi është përplasur me një autobus ku ndodheshin studentë. Nga autobusi nuk ka asnjë person të lënduar, ndërkohë që të 7 personat që ndodheshin në autoveturë kanë marrë plagë, 4 prej tyre ishin fëmijë.
Sipas të dhënave, një prej fëmijëve ndodhet në gjendje të rëndë. Ata janë dërguar fillimisht në spitalin e Gjirokastrës dhe më pas janë sjellë me helikopter në Qendrën Spitalore të Traumës në Tiranë.
