E kanë quajtur ndër vite “bastexhi”, “të dopuar” apo “parukja”, por tani do ta kenë në drejtim të ekipit të zemrës. Antonio Conte do të marrë zyrtarisht drejtimin e Interit duke nisur nga dita e enjte ose e premte, pasi të bëhet edhe emërimi dhe komunikata e klubit.
Si do ta mirëpresin tifozët atë që e quanin “armik” dhe që e kanë ofenduar sa herë i është dhënë rasti?! Kjo mbetet për t’u parë, ashtu si mbetet për t’u parë se çfarë ndjesie do t’iu japë kjo video, e bërë menjëherë pas mbylljes së kampionatit në sezonin 2001-2002, kur Juventusi fitoi titullin kampion, ndërsa Interi e humbi duke u mundur në Romë nga Lazio.
Pikërisht Conte festonte si i çmendur dhe përpara gazetarit tha “e kishim hak, morëm atë që na u mor në Peruggian e famshme. Tani po e shijojmë ne këtë moment dhe njëri që ishte në Peruggia na sheh nga televizori se si po festojmë… (referuar Materazzit, që luante me Peruggia atë vit dhe që u bë emblemë e Interit më pas).
