Kryeministri Edi Rama i është përgjigjur pa ekuivok propozimit të Presidentit Meta, i cili u shpreh i gatshëm për shtyrjen e zgjedhjeve lokale, për daljen nga kriza politike.
Rama u shpreh se zgjedhjet do të zhvillohet më 30 qershor dhe kjo nuk negociohet.
“Presidenti në këndvështrimin tim ka shprehur një gatishmëri për tu vënë në dispozicion të një zgjidhje me pëlqimin e partive politike, sepse kështu e përcakton vetë Kushtetuta. Partia Socialiste, shumica qeverisëse, nuk ka asnjë pëlqim lidhur me asnjë diskutim për shtyrjen e datës së zgjedhjeve. Kjo s’ka lidhje me sforcon e respektueshme të presidentit, ka lidhje me qëndrimin tonë të prerë e të qartë që në 30 qershor s’është çështja kush i fiton zgjedhjet bashkiake, por duhet të fitojë Shqipëria institucionale dhe kushtetuese”, tha Rama.
“I duhet dhënë Çezarit ajo që i takon Çezarit. E vlerësoj gatishmërinë dhe jam i bindur se nuk e keqkupton reagimin në raport me këtë pyetje që s’kemi datë për të negociuar dhe s’kemi Kushtetutë për të anashkaluar”, shtoi.
