Kolegji i Posaçëm i Apelimit ka vendosur shkarkimin e Rovena Gashit, në përfundim të një procesi të kontestuar fuqishëm nga prokurorja e Prokurorisë së Përgjithshme.
Trupa gjykuese, e drejtuar nga Albana Shtylla, shpalli mesditën e së Mërkurës se Kolegji vendosi të lërë në fuqi vendimin e Komisionit të Pavarur të Kualifikimit, i cili e shkarkoi nga detyra Rovena Gashin.
Gjatë seancës, gjyqtarja Shtylla iu referua në pjesën më të madhe vendimit të shkallës së parë të Vetingut. Sipas vendimit të KPK, të cilit iu referua Kolegji i Apelimit, prokurorja Rovena Gashi ka më shumë pasuri se sa e justifikon me burime të ligjshme, si edhe ka bërë deklarim të pasaktë të pasurisë.
Në vendimin e lexuar publikisht, kryesuesja e trupës gjykuese nuk paraqiti gjetjet e Kolegjit të Apelimit, por u mjaftua me renditjen e konstatimeve të një shkalle më të ulët.
Procesi i Vetingut të prokurores Gashi është shoqëruar me debate të shumta që në krye të herës. Prokurorja Gashi është e vetmja, deri më tani, që nuk u paraqit në seancën e zhvilluar nga KPK, në verën e vitit 2018.
Nëpërmjet një letre publike, Gashi refuzoi pjesëmarrjen në seancën dëgjimore të Komisionit të Pavarur të Kualifikimit, për shkak se trupa e komisionerëve nuk kishte marrë në konsideratë provat e depozituara prej saj.
Pas shkarkimit nga KPK, prokurorja Gashi e ankimoi vendimin pranë Kolegjit të Posaçëm të Apelimit. Trupa gjykuese e KPA zhvilloi tre seanca, në të cilat refuzoi përfaqësuesin ligjor të prokurores, duke i hequr praktikisht mjetin ligjor për të pasur mbrojtës.
Pas këtij refuzimi, Gashi nuk mori pjesë në vijimin e seancës, si edhe në momentin e shpalljes së vendimit, ku ajo u shkarkua përfundimisht nga pozicioni i prokurores në Prokurorinë e Përgjithshme.
Megjithatë, “beteja” e Gashit vijon ende, pasi ajo ka ankimuar procedurat e ndjekura nga strukturat e Vetingut në Gjykatën e Strasburgut. Rasti “Gashi” është i pari që ka regjistruar Gjykata Europiane e të Drejtave të Njeriut mbi bazën e ankimeve të gjyqtarëve dhe prokurorëve. /BN/