Te Skënderbeu presin nga momenti në moment që të marrin lajme nga KAS. Në klub janë aq optimistë, sa besojnë se do të prezantohen sërish në futbollin europian pas mungesës gati 2-vjeçare. Me fitoren e arritur ndaj Luftëtarit, janë zgjuar shpresa të mëdha për të kapur sportivisht zonën “Euro” dhe më pas do të shohin se çfarë përgjigje do të vijë nga Lozana.

Sinjalet e mira ndihen në ambientin bardhekuq, madje lëvizjet e fundit të bëjnë të besosh se ditë me diell priten në Korçë. Pas javës së parafundit, ekipi ka marrë pushimet e parakohshme. Kur dihet që java e 36-të u rezervon në kalendar përballjen me Kamzën dhe marrin trepikëshin në tavolinë, nuk u mbetet tjetër veçse të presin rezultatet e rivalëve, me shpresën që t’u shkojnë për shtat për të kapur Europën.

GRUMBULLIMI – Ajo që të lë shijen më të mirë nga zhvillimet e fundit në klub është vendimi për të nisur sa më shpejt fazën përgatitore. Nga burime të besueshme, mësohet se lojtarët janë njoftuar që në datën 11 qershor duhet të jenë të gjithë të pranishëm në “Tropikal Resort”.

Ky grumbullim, as më pak dhe as më shumë, tregon se te Skënderbeu nuk kanë kohë për pushime të zgjatura, sepse i presin aktivitetet e mundshme në Kupat e Europës. Një lëvizje e tillë të bën të mendosh se korrespondencat me KAS kanë qenë pozitive dhe lajmi pritet i bujshëm. Për këtë arsye, korçarët nuk duan që të jenë të papërgatitur për turin e parë eliminator. Grumbullimin në datën 11 qershor e ka konfirmuar edhe trajneri i Skënderbeut. Orges Shehi ka treguar se ekipi do të ribashkohet në javën e dytë të qershorit në Durrës, pra, disa ditë para hedhjes së shortit.

KONTRATA – Me sezonin që është mbyllur tashmë, edhe pse verdikti final nuk është dhënë ende për pozitat në renditje, në Korçë do të fillojnë të mendojnë edhe për organikën. Stafi drejtues dhe ai teknik do të vlerësojnë kontributin e gjithsecilit për 35 javët që lamë pas. Në kushte të tilla, janë të shumtë ata lojtarë që kanë kaluar pjesërisht provën dhe do të kërkohet qëndrimi i tyre.

Ndërsa, nga ana tjetër, pritet që një pjesë e mirë të jetë me “valixhe në duar” për t’u larguar nga Skënderbeu. Veç titullarëve që janë nën kontratë dhe disa senatorëve që marrëveshjet i kanë pasur sezonale, që me shumë mundësi do të negociojnë për rinovim, në listën e dëshirave janë edhe Marko Pervan dhe Kuasi Sibo. Që të dy lojtarët që kanë ardhur në formë huazimi, janë pjesë e planeve të klubit. Ata janë larguar nga Shqipëria pas ndeshjes së fundit, por do të mbahen në kontakt të vazhdueshëm, pasi me shumë mundësi do t’i shohim sërish më 11 qershor, kur ekipi të grumbullohet. Në anën tjetër, drejt largimit duken Toskiç e Kurti, që nuk kanë treguar shumë nga potenciali i tyre se çfarë mund të bëjnë për këtë ekip.