Kryeministri Edi Rama mësohet se ka planifikuar të zhvillojë një mbledhje në kryeqytet më herët gjatë kësaj të marte me deputetët socialistë dhe drejtuesit e qarqeve.
Takimi, në formën e një darke pune informale, pritet të nisë në orën 19:00. Në fokus të tij, është planifikuar të jetë struktura e fushatës dhe marrëdhënia me opozitën, thanë burime pranë PS. Kryeministri pritet të informojë të vetët për strategjinë.
Po sot, kreu i PD-së Basha ka mbledhur në selinë blu ish deputetët e Tiranës dhe krerët e degëve, ku është diskutuar lidhur me aksionin opozitar.
Tensionet mes palëve politike sa vijnë e shtohen me afrimin e 30 qershorit, data e dekretuar nga Presidenti Ilir Meta për zhvillimin e zgjedhjeve lokale. Opozita e bashkuar, që ka dorëzuar mandatet prej kohësh, ka refuzuar pjesëmarrjen në zgjedhje. Nga opozita kërkohet largimi i kryeministrit Edi Rama dhe krijimi një qeverie tranzitore për të garantuar zgjedhje të lira e të ndershme. Ndërsa shefi i qeverisë është shprehur se zgjedhjet do të zhvillohen më 30 qershor dhe ende nuk ka asnjë shenjë nga ai, për të plotësuar kërkesën e opozitës për dorëheqje. /bn/
