Prezenca e OSBE në Shqipëri ka dalë me një deklaratë pak orë para protestës së opozitës.
OSBE thekson se nuk pranohet dhuna nga protestuesit, dhe as reagimi i tepruar i forcave të rendit, duke iu referuar protestës së 11 majit. Pak orë para tubimit të së shtunës së opozitës, ambasadori Boschart, në një deklaratë të nisur medias, kujton dënimin që i kanë bërë dhunës së 11 majit të gjithë përfaqësuesit e OSBE në Europë.
Deklarata nxit pjesëmarrësit dhe drejtuesit e protestës që të jenë të përmbajtur, dhe shton se përmendja e derdhjes së gjakut pak ditë para një proteste publike është e papërputhshme me demokracinë.
Deklarata e plotë:
BE-së — Prezenca e OSBE-së në Shqipëri, Kryetari i Radhës i OSBE-së dhe ministri i Jashtëm e për Evropën i Sllovakisë, Miroslav Lajčak, Sekretari i Përgjithshëm i OSBE-së, Thomas Greminger, Presidenti i Asamblesë Parlamentare të OSBE-së, George Tsereteli dhe Sekretari i Përgjithshëm i Asamblesë Parlamentare të OSBE-së, Roberto Montella — e dënuan fuqishëm përdorimin e dhunës, nga ana e protestuesve, në kryeqytetin e Shqipërisë, Tiranë, më 11 maj 2019. Ata theksuan të drejtën për t’u tubuar dhe për të protestuar në mënyrë paqësore, por nënvizuan se dhuna është e papranueshme dhe se trazirat nuk mund të zëvendësojnë angazhimin politik demokratik. E sjellim në vëmendje këtë deklaratë përpara protestës së 25 majit 2019. Deklarata mbetet po aq e vlefshme sa edhe dy javë më parë. Koktejet e molotovit, hedhja e gurëve dhe e shashkave janë të paligjshme; reagimi i tepruar i forcave të rendit nuk mund të pranohet. I nxitim pjesëmarrësit dhe drejtuesit e protestës së sotme të jenë të përmbajtur. Përmendja e derdhjes së gjakut, pak ditë përpara një proteste publike, është e papërputhshme me demokracinë moderne dhe me protestat demokratike.
