Kreu i opozitës, Lulzim Basha i është përgjigjur nga Durrësi, letrës publike të kryeministrit Edi Rama, i cili e fton për dialog.
Në fjalën e tija para demokratëve, Basha tha se shqiptarët dhe opozita e bashkuar nuk do të bëjnë asnjë hap pas drejt kauzës së tyre: Shqipëria si gjithë Europa!
‘Dje nuk u përmbajta dot nga emocionet që më shkaktoi pritja në Berat, sot jam i shtangur dhe i pafjalë nga ky uragan. Nga kraharorët e durrsakëve të lirë po troket ora e ndryshimit të madh që pi vjen.
Zonja e zotërinj, ditë për ditë sytë e shqiptarëve janë drejt pasditeve ku ne bashkohemi në salla dhe në sheshe në numra të paparë e të padëgjuar prej dekadash, me një qëllim dhe një kauza, dhe një përbetim për të mos hedhur asnjë hap pas në betejën tonë kombëtare, kauzën tonë për Shqipërisë si gjithë Europa. Një bashkim i tillë popullor nuk është parë që në ditët e përmbysjes së diktaturës, ditët që bashkuan shqiptarët drejt ëndrrës së lirisë, dinjitetit dhe mirëqenies. Rruga jonë drejt Europës, është e mbushur me dhimbje dhe sakrifica. Shqiptarët nuk do të largohen më kurrë nga vendi i tyre, nga frika e bandës në pushtet nga kryehajduti. Ka ardhur koha e një beteje vendimtare për jetë a vdekje, për ta bërë Shqipërisë si gjithë Europa’, deklaroi Basha.
