Bujar Leskaj ka hequr dorë nga delegimi i kompetencave si kryetar i KLSH-së, veprim që e ndërmorri pasi i përfundoi mandati si kryetar i këtij institucioni.
Në këtë mënyrë, Leskaj ka marrë në dorë sërisht drejtimin e KLSH-së, funksione që i kishte deleguar më parë te zv.kryetarja Lindita Lati Milo.
Në vendimin e firmosur nga Bujar Leskaj theksohet fakti se zv.kryetarja e KLSH-së, Lindita Lati Milo është tërhequr nga ushtrimi i kompetencave të kryetarit për arsye personale.
Leskaj thekson se për të garantuar vijueshmërinë e punës, do të qëndrojë në këtë funksion deri në zëvendësimin e tij.
“Pas kërkesës për tërheqje nga kompetencat e deleguara të zv. Kryetares, znj. Lindita Milo për arsye personale, dt. 21.05.2019, nr. 347, dhe garantimit te vijueshmërisë normale të punës;
Në kushtet e zgjatjes në kohë të nominimit dhe përzgjedhjes së Kryetarit të ri të KLSH-së, sipas përcaktimeve të Ligjit 154/2014.
VENDOSA:
- Shfuqizimin e kompetencave të deleguara me vendimin e Kryetarit nr. 244, datë 12.12.2018 zv/Kryetarit të KLSH-së znj. Lindita Lati (Milo).
- Ky vendim do i përcillet Presidentit të Republikës, Kryetarit të Kuvendit, Kryetarit të opozitës.
- Vendimi hyn në fuqi pas botimit në fletoren zyrtare”, thuhet në vendimin e kreut të KLSH.
